ຣົດໄຟຄວາມໄວສູງ ອາຈແພງເກີນຄາດ

ການສ້າງທາງ ຣົດໄຟ ຄວາມໄວສູງ ມີບັນຫາຢູ່ວ່າ ຄ່າກໍ່ສ້າງ ສູງເກີນໄປ ສູງເຖິງ 800 ຕື້ບາດ. ອີກບັນຫາ ທີ່ສອງ ປະເທດໄທ ບໍ່ຄືຢູໂຣບ ເພາະ ປະຊາຊົນໄທ ອາໃສ ຢູ່ບ້ານໃກ້ໆ ກັບທາງຣົດໄຟ ສະນັ້ນ ຈຶ່ງບໍ່ເໝາະ ສຳລັບ ຈະປັບປຸງ ທາງຣົດໄຟ ທີ່ມີຢູ່ແລ້ວ ໃຫ້ກາຍເປັນ ທາງຣົດໄຟ ຄວາມໄວສູງ ເພາະມັນຈະເປັນ ອັນຕະຣາຍ ຕໍ່ຊຸມຊົນ ແລະ ບັນຫາທີ່ສາມ ການສ້າງທາງ ຣົດໄຟ ຄວາມໄວສູງ ຕ້ອງໃຊ້ ວິຊາການ ແລະ ເທັກໂນໂລຈິ ທີ່ທັນສມັຍ ແພງ ຖ້າບໍ່ດັ່ງນັ້ນ ກໍຈະບໍ່ ປອດໄພ ແລະ ມັກຈະເກີດ ອຸບັດຕິເຫດ ດັ່ງທີ່ໄດ້ເກີດຂື້ນ ຢູ່ຈີນ ຫລາຍເທື່ອແລ້ວ.

ຣັຖບານໄທ ມີແຜນຈະສ້າງ ທາງຣົດໄຟ ຄວາມໄວສູງ ສອງສາມສາຍ ເຊັ່ນສາຍ ຈາກບາງກອກ ຂື້ນໄປຫາ ເມືອງຊຽງໃໝ່ ແລະ ຊຽງຮາຍ ພາກເໜືອ ຂອງໄທ ແລະ ອີກສາຍນຶ່ງ ຈາກ ບາງກອກ ຫາເມືອງໜອງຄາຍ. ປັດຈຸບັນ ນັກຊ່ຽວຊານ ຍີ່ປຸ່ນ ກຳລັງ ສຶກສາສຳຣວດ ຄວາມເປັນໄປໄດ້ ໃນການສ້າງ ທາງຣົດໄຟ ຄວາມໄວສູງ ຈາກບາງກອກ ຫາ ເມືອງຊຽງໃໝ່ ສ່ວນນັກຊ່ຽວຊານ ຈີນ ກຳລັງ ສຶກສາສຳຣວດ ເສັ້ນຈາກ ບາງກອກ ຫາເມືອງຊຽງຣາຍ ແລະ ເມືອງໜອງຄາຍ

ເມື່ອສອງສາມເດືອນ ກ່ອນ ນາຍົກ ຣັຖມົນຕຣີລາວ ທອງສິງ ທັມມະວົງ ກ່າວຢູ່ກອງປະຊຸມ ສຸດຍອດ ເສຖກິດໂລກ ທີ່ບາງກອກວ່າ ສປປລາວ ຍັງຈະສືບຕໍ່ ສ້າງທາງຣົດໄຟ ຄວາມໄວສູງ ຈາກ ຊາຍແດນຈີນ ລົງໄປເຖິງ ນະຄອນຫລວງ ວຽງຈັນ ນັ້ນຢູ່ ແຕ່ຣັຖບານ ລາວແລະຈີນ ຍັງມີຂໍ້ຂັດແຍ່ງ ບາງຢ່າງທີ່ຍັງ ຕົກລົງກັນບໍ່ໄດ້. ໃນບັນຫານຶ່ງ ກໍແມ່ນ ຈີນ ຢາກຂໍດິນ ຈາກທັງສອງຂ້າງ ຂອງທາງຣົດໄຟ ແຕ່ ສປປລາວ ບໍ່ຍອມຕົກລົງ.