ທຸຣະກິດຂອງວຽດນາມ ທໍາລາຍສີ່ງແວດລ້ອມ

ສະພາບແວດລ້ອມ ຢູ່ ແຂວງເຊກອງ ແລະ ແຂວງ ອັດຕະປື ໄດ້ຮັບຄວາມ ເສັຽຫາຍ ຈາກ ທຸຣະກິດ ການລົງທຶນ ຂອງ ວຽດນາມ.
ສິດນີ
2013-01-08
Share

ເຈົ້າຫນ້າທີ່ ແຂວງເຊກອງ ທ່ານນື່ງ ຮັບວ່າ ແມ່ນ້ຳເຊກອງ ໄດ້ຮັບຜົລກະທົບ ຈາກ ໂຄງການ ລົງທຶນຕ່າງໆ ຂອງວຽດນາມ ເນື່ອງຈາກວ່າ ໂຄງການ ການລົງທຶນ ວຽດນາມ ໄດ້ປ່ອຍ ສີ່ງເສດເຫລືອ ແລະ ມົລພີດ ລົງໃສ່ແມ່ນ້ຳ ສົ່ງຜົລກະທົບ ຕໍ່ປະຊາຊົນ ແຂວງເຊກອງ ແລະ ແຂວງ ອັດຕະປື ຢ່່າງກວ້າງຂວາງ ໃນເວລານີ້ ດັ່ງໂຄງການ ປູກຢາງພາລາ ແລະ ການຮ່ອນຄຳ ຕາມແມ່ນ້ຳສາຂາ ຕ່າງໆ ໃນແຂວງ.

ຜ່ານມາ ທ່ານ ພອນມະນີ ຂຽນໄຊຍະວົງ ສະມາຊິກ ສະພາແຫ່ງຊາດ ຈາກ ແຂວງອັດຕະປື ໃຫ້ການ ຢືນຢັນວ່າ ບັນຫາ ທີ່ປະຊາຊົນ ໃນແຂວງ ອັດຕະປື ໄດ້ຮ້ອງຮຽນ ມາຫລາຍທີ່ສຸດ ໃນເວລານີ້ ກໍແມ່ນຢາກໃຫ້ ຣັຖບານ ກວດສອບ ການໃຫ້ ສຳປະທານທີ່ດິນ ຂອງຣັຖບານ ກັບ ນັກລົງທືນ ຕ່່າງຊາດ ຄືນໃຫມ່ ເນື່ອງຈາກ ເຂດສຳປະທານ ໄດ້ໄປກວມເອົາ ດິນ ຊາວບ້ານ ແລະ ບາງແຫ່ງ ກໍສົ່ງມົລພິດ ລົງໃສ່ ແມ່ນ້ຳລຳທານ. ດັ່ງທ່ານກ່າວ ໃນຕອນນື່ງວ່າ:

"ດັ່ງທີ່ເຮົາຮູ້ແລ້ວ ຣັຖບານ ໄດ້ອະນຸມັດ ໂຄງການໃຫຍ່ໆ ຣະດັບຊາດ ຢູ່ແຂວງ ອັດຕະປື ເພື່ອ ປູກຢາງພາລາ ແລ້ວມັນ ແຕະຕ້ອງ ຊີວີດ ການເປັນຢູ່ ຂອງ ປະຊາຊົນ ຢາກສເນີໃຫ້ ຣັຖບານ ກວດກາຄືນ ກ່ຽວກັບ ການອະນຸມັດ ໂຄງການ ດັ່ງກ່າວ ບໍ່ໃຫ້ມັນ ກະທົບ ຕໍ່ຊິວິດ ການເປັນຢູ່ ຂອງປະຊາຊົນ ຫລາຍ ເປັນຕົ້ນ ບ່ອນທຳມາຫາກິນ ແລະ ດິນເນື້ອທີ່ ຜລິດ ຂອງ ປະຊາຊົນ".

ຊາວບ້ານ ໃຫ້ການວ່າ ນອກຈາກ ໄປກວມເອົາດິນ ຊາວບ້ານແລ້ວ ກຸ່ມນັກລົງທຶນ ວຽດນາມ ຍັງລະເມີດ ສັນຍາ ການໃຫ້ ສຳປະທານ ກັບຣັຖບານ ໃນຫລາຍພື້ນທີ່ ນຳອີກ ໂດຍສະເພາະ ສັນຍາ ໃນການຂຸດຄົ້ນ ແຮ່ທາດ ທີ່ນັກລົງທຶນ ວຽດນາມ ໄດ້ປ່ອຍມົລພິດ ລົງສູ່ ແມ່ນ້ຳລຳທານ ປາສຈາກ ການຄວບຄຸມ ສິ່ງແວດລ້ອມ ຮ່ວມທັງ ການລັກຕັດໄມ້ ໃນປ່າ ທີ່ຕ້ອງຫ້າມ ໃນ ແຂວງນຳອີກ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ