Misir weziyitining arqa körünüshi
2012.11.29
Chünki misirda yéngi dölet qanuni élan qilin'ghandin kéyin, bu qanun köpligen solchi partiyilerge we sabiq re'is mubarekning dewride hakimiyette turghanlarning yandashlirigha yaqmighan. Shu sewebtin ular misirda hökümetke qarshi omumyüzlük namayish uyushturghan. Emma bular mursini qollaydighanlarning özliridin köp ikenlikini hésabqa qatmighan. Netijide, mursini qollap namayish qilghanlarning sani uninggha qarshi namayish qilghanlarning sanidin köp bolup kétip, netije ular kütkendek chiqmastin, eksiche, xelqning mursi hökümitige bolghan ishenchi ashqan.
Londonda chiqidighan “Ottura sherq” gézitining 2012-yili 26-noyabir sanida, yazghuchi tariq hemidning qelimi bilen “Misirdiki krizis” dégen témida bir maqale élan qilin'ghan bolup, uningda mundaq dep yézilghan:
“Misir ereb jumhuriyitining prézidénti doktor muhemmed mursining yéngi dölet qanunini élan qilishi misirda weqe tughdurush üchün purset kütup yatqan solchilarni heriketke keltürdi. Emma ular hemmisi oylap baqmighan bir küch teripidin yéngildi we ularning qilghan namayishi ziyinigha bolup chiqti. Bu küch misir xelqining küchi idi. Chünki mursining hökümitige qarshi chiqquchilar asasen solchilar, mubarek hökümitining qalduqliri we mursining tehditige uchrighan kapitalistlardur. Emma xelq omumen mursi hökümitini qollaydu. Doktor mursi nahayiti aqilane siyaset qollan'ghan bolup, tunji qararida sabiq re'is mubarek hökümitining qalduqlirini jazalash we démokratiyini kapaletlendürüshni sözligen idi. Bu qarar 25-yanwar namayishigha qatnashqanlarni ziyan'gha uchratqanlar üchün matem bolsa, misirdiki xelq ammisi üchün bayram bolghan idi. Axirida solchilar, mubarek yandashliri we kapitalistlar birliship mursi hökümitige qarshi turghan bolsimu, ular ghelibe qilalmidi we nöwettiki jengde yéngildi.”
Misir tüzelse ereb döletliri tüzilidu
Se'udi erebistanida chiqidighan “El medine” gézitining 2012-yili 27-noyabir künidiki sanida “Misir tüzelse ereb döletliri tüzilidu” dégen témida bir maqale élan qilin'ghan bolup, uningda mundaq dep yézilghan:
“Misir ereb we islam dunyasigha biwasite tesir körsitidighan istratégiyilik dölet. Ereblerning ehwali tüzelsimu misirdin tüzülidu, buzulsimu misirdin buzulidu. Ereb baharini netijisiz qaldurmaqchi bolghanlar buni yaxshi bilgenliktin, misirgha köprek xiris qilmaqta. Emma misir hökümiti hemme ishni hékmet we aqilanilik bilen élip barmaqta. Misirdiki talash-tartish yalghuz misirningla mushkilisi bolup qalmastin, pütün ereblerning mushkilisi bolmaqta. Chünki misirda démokratik musulman döliti dawam qilmaqta. Buni burmilap xelqni qozghimaqchi bolghanlar mursining hökümitini iran hökümitige oxshitip xelqni uningdin sowutushqa urunmaqta. Emma emeliyette bu ikkisining otturisida asman-zémin perqi bar. Irandikisi din döliti, emma misirdikisi démokratik musulman döliti.”