ئۇيغۇر ناخشا-مۇزىكا تەتقىقاتچىسى ئەلىس ئاندېرسوننىڭ 2018-يىلدىكى ئۇيغۇر دىيارى زىيارىتى (1)

نۆۋەتتە ئىندىيانا ئۇنىۋېرسىتېتىدا مۇزىكا ۋە فولكلور تەتقىقاتى بويىچە دوكتورلۇق ئاسپىرانتلىقىدا ئوقۇۋاتقان ئەلىس ئاندېرسون خانىم دۇتار بىلەن ناخشا ئورۇنلىماقتا. (ۋاقتى ۋە ئورنى ئېنىق ئەمەس)

ئەلىس ئاندېرسون: «ئۇيغۇر موماي ماڭا ‹بۇرۇنقى ئۈرۈمچى يوق، بىزنى يوقىتىۋاتىدۇ› دېدى»

نۆۋەتتە ئىندىيانا ئۇنىۋېرسىتېتىدا مۇزىكا ۋە فولكلور تەتقىقاتى بويىچە دوكتورلۇق ئاسپىرانتلىقىدا ئوقۇۋاتقان ئەلىس ئاندېرسون خانىم 2012-يىلدىن 2016-يىلغىچە ئۈرۈمچىدە ئۇيغۇر تىلى ۋە ئۇيغۇر ناخشا-مۇزىكىلىرىنى ئۆگىنىش ھەمدە تەتقىق قىلىش بىلەن شۇغۇللانغان.

ئۇ شۇ يىللاردا ئۇيغۇر دىيارىدا ئۆتكۈزۈلگەن «يىپەك يولى ساداسى» ناملىق ناخشا مۇسابىقىسىدە ئۇيغۇر ناخشىلىرىنى ئەينەن ۋە ۋايىغا يەتكۈزۈپ ئورۇنداپ، ئۇيغۇرلار ئارىسىدا «نازاكەت» دېگەن ئىسىم بىلەن تونۇلغان ئىدى. ئەلىس ئاندېرسون خانىم بۈگۈنكى كۈندە ئۇيغۇر رايونىدىكى جازا لاگېرلىرىنى تاقاش ۋە ئۇيغۇر تۇتقۇنلارنى قۇتۇلدۇرۇش ھەرىكىتىدە مۇھاجىرەتتىكى ئۇيغۇرلار بىلەن بىر سەپتە تۇرۇپ قاتتىق ئىنكاس قايتۇرۇۋاتقان، ئۆزى شەخسەن گۇۋاھلىق بېرىش ۋە باشقا شەكىللەر بىلەن ئۇيغۇرلار دۇچ كېلىۋاتقان بۇ زۇلۇملارغا قارشى تۇرۇۋاتقان غەرپلىك تەتقىقاتچىلارنىڭ بىرى.

ئۇنىڭ رادىيومىزغا بىلدۈرۈشىچە، ئۇ 2018-يىلى 6-ئاي مەزگىلىدە ئۇيغۇر دىيارىدا 2 ھەپتىلىك قىسقا زىيارەتتە بولغان ئىكەن. ئۇيغۇر دىيارىنىڭ ۋەزىيىتىنى دۇنياغا ئاڭلىتىشنى ئۆزىنىڭ بۇرچى دەپ بىلگەن ئەلىس ئاندېروسون خانىم ئۆز كۆزى بىلەن كۆرگەن ئەھۋاللارنى ئاڭلىغۇچىلار بىلەن ئورتاقلىشىش قارارىغا كەلگەن. تۆۋەندە دىققىتىڭلار مۇخبىرىمىز مېھرىباننىڭ ئەلىس ئاندېرسون خانىم بىلەن ئۆتكۈزگەن سۆھبىتىنىڭ 1-قىسمىدا بولسۇن.