Erdoghanning qazaqistanda “Sherqiy türkistandin kelgen xewerler bizni ensiretmekte” dégini némini chüshendüridu?

Türkiye prézidénti rejep tayyip erdoghan ötken hepte qazaqistan'gha élip barghan ziyariti jeryanida 16-aprél küni qazaqistanning türkistan shehiridiki türkiye-qazaqistan ortaq qurghan exmet yesewi uniwérsitétini ziyaret qilip, türkiye sélip bergen meschit we kutupxanining échilish murasimigha qatnashti. Arqidin uniwérsitét teripidin özige bérilgen pexri doktorluq unwanini élish murasimigha qatnashti.

U, murasimda qilghan nutqida “Sherqiy türkistan we birmadin kelgen xewerler bizni ensiretmekte, biz türkiye bolush süpitimiz bilen tariximiz we zéminimiz bizge yükligen mes'uliyetni chüshinip yétiglik” dégen sözlerni tekitlidi.

Türkiye jumhuriyiti dölet re'isi rejep tayyip erdoghanning qazaqistanning türkistan shehiride qazaqistan dölet bashliqi nursultan nazarbayéfning yénida sherqiy türkistan mesilisini tilgha élishini qandaq chüshinishimiz kérek? bu sözining qazaqistanning Uyghur siyasitige tesiri bolarmu? dégen so'allarni chöridigen halda türkiye istratégiyilik chüshenche instituti türkiye-xitay munasiwetliri mutexessisi doktor erkin ekrem we Uyghur xewer we tetqiqat merkizi tetqiqatchisi hamut göktürk ependiler bilen söhbet élip barduq.

Dr. Erkin ekrem ependi, türkiye dölet re'isi rejep tayyip erdoghanning sherqiy türkistanni tilgha élishi türkiye hökümitining mezlum we ézilgen xelqlerge yardem qilishtin ibaret qimmet qarishining netijisi ikenlikini bayan qildi.

Hamut göktürk bolsa, türk dunyasining tarixiy shehiri, exmet yesiwiy hezretlirining qebrisi bar türkistanda türk dunyasida gépi ötidighan chong döletlerdin biri bolghan türkiye jumhuriyiti re'isi rejep tayyip erdoghanning sherqiy türkistan mesilisini tilgha élishining zor ehmiyetke ige ikenlikini bayan qildi.