Shi jinping “Chiriklikke qarshi” dawamliq urush qilalamdu ?

Muxbirimiz irade
2015.04.03
Share on WhatsApp
Share on WhatsApp
bo-shiley-sot.jpg Chungching shehirining sabiq partkom sékrétari, xitay kompartiye siyasiy byuro ezasi bo shiley sotqa tartilmaqta. 2013-Yili 22-awghust, jinen.
AFP


Bügün, xitay aliy teptish mehkimisi sabiq kompartiye siyasiy byuru da'imiy ezasi, siyasiy qanun sékritari ju yungkangni parixorluq, hoquqini süyi'istimal qilish we dölet mexpiyetlikini ashkarilash jinayiti bilen resmiy eyiblidi. Közetküchilerning qarishiche, bu shi jinpingning chiriklikke qarshi turush nami astida élip bériwatqan kürishining yene dawam qilidighanliqidin dérek béridiken. Biraq, bezi közetküchiler shi jinpingning chiriklikke qarshi kürishini yene kéngeytip dawam qilalaydighanliqigha guman bilen qarimaqta.

Hörmetlik radiyo anglighuchilar, xitay dölet re'isi shi jinping chiriklikke qarshi turush kürishini ilgiriki herqandaq bir dölet re'isidin bek qattiq élip barmaqta. Lékin bu urush qeyerge bérip toxtaydu? uning aqiwiti néme bolidu? bügün, xitayning eng qudretlik emeldarliridin biri hésablinidighan ju yungkangning bügün resmiy halda xitay aliy teptish mehkimisi teripidin parixorluq, hoquqini suy'istimal qilish we dölet mexpiyetlikini ashkarilash jinayiti bilen eyiblinishi yuqiridiki so'allarni téximu ulghaytiwetti. Xitay weziyitini közetküchiler buning néme menini ipadileydighanliqini mulahize qilishmaqta. Amérikidiki Uyghur ziyaliysi, siyasiy mulahizichi ilshat hesen ependi ju yungkangning délosi xitay kompartiyisi ichidiki siyasiy küreshning intayin keskinlikini körsitip béridu, deydu.

Xewerlerdin qarighanda, bu qétim ju yungkanggha artilghan jinayet aldinqi nöwettikidin azraq perqliq iken. Mesilen, aldinqi qétim “Bo shiley bilen birliship, normal bolmighan siyasiy pa'aliyet élip bérish” dégen eyiblesh bar idi. Biraq bu qétim u chiqiriwétilip, uning ornigha “Dölet mexpiyetlikini ashkarilash” dégen jinayet qoshulghan. Ilshat hesen ependi shi jinpingning özige düshmen köpeytiwalmasliq üchün shundaq bir usulni qollan'ghanliqini bildürdi.

Xongkongdiki échiwétish zhurnilining muherirri jin jung ependimu radiyomizgha bildürgen ipadiside, shi jinpingning bu dawani siyasiygha chétiwélishtin uzaq turuwatqanliqini, chünki bundaq qilghanda téximu köp qollashqa we xelqning hésdashliqigha érisheleydighanliqini bildürgen. U “Shi jinping we uning shérikliri xitay xelqige tarixtiki siyasiy dawalarni eslitip qoyushtin hezer eylewatidu” dégen.

Jenubiy junggo seher géziti bügün bu heqte élan qilghan mulahiziside, ju yungkangning bügün xitay aliy teptish mehkimisi teripidin resmiy eyiblinishini shi jinpingning bu küreshni yenimu ilgirilep dawam qilidighanliqining ipadisi, dep qarighan. Biraq ilshat hesen ependi shi jinpingning bu küreshni dawam qilghan teqdirdimu emdi undaq chong béliqlargha aldirap tegmeydighanliqini bildürdi.

Ju yungkanggha artilghan jinayetlerdin qarighanda ju yungkanggha kéchiktürüp ijra qilinidighan yaki derhal ijra qilinidighan ölüm jazasi bérilish éhtimali küchlük iken. Biraq, ju yungkanggha dölet mexpiyetlikini ashkarilash dégen jinayet artilghanliqi üchün bu ju yungkanggha a'it sotqa a'it détallarning yenila yoshurun qalidighanliqi, sotning asasen yépiq bolidighanliqidin dérek béridiken. Xitay weziyitini közitiwatqan közetküchiler birdek, nöwette xitay kompartiyisi ichidiki weziyetning intayin jiddiylikidek bir nuqtida ortaqlashmaqta. Jin jung ependi bu heqte toxtilip “Herqandaq bir siyasiy hujum uzun muddette bir muqimliq yaritalmaydu, maw zidungmu eyni waqitta partiye ichidiki nurghun emeldarlarni öriwetken. Biraq maw zidungning barliq idiyiliri we siyasetlirimu ölümi bilen tengla yoqaldi” dégen. Béyjingdiki xelq uniwérsitétining proféssori jang ming jenubiy junggo seher gézitige qilghan sözide, hazirqi siyasiy weziyetning intayin jiddiylikini tekitlep “Buning aqiwitini mölcherlesh qéyin, chünki xitayda chiriklikning yiltizi bek chongqur we bek keng” dégen.

Ilshat hesen ependi bolsa bu heqte toxtilip shi jinpingning hazir keynige qaytishqa mumkin bolmaydighan bir yolda méngiwatqanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.