Хитай даирилири үрүмчи шәһириниң асаслиқ районлирини 5G тори билән қаплап болған

Мухбиримиз әркин
2020-07-06
Елхәт
Пикир
Share
Принт

Хитай һөкүмити уйғур районида 5G тор қурулушиниң сүритини тезлитип, үрүмчи шәһириниң асаслиқ районлирини 5G тори билән қаплап болған. Шинхуа агентлиқиниң хәвәр қилишичә, нөвәттә үрүмчидики төмүр йол идариси, хуаңхе сода райони, достлуқ сода райони, мидоң сода райони, шавшиго сода райони, айродром вә тәз сүрәтлик пойиз йоли линийисиниң икки қасниқи қатарлиқ адәм еқими көп районлар 5G тори билән қаплинип рәсмий ишқа киришкән. Хитай даирилири өткән йилдин башлап уйғур диярида 5G қурулушини тез омумлаштурушқа киришип, униңға зор миқдарда мәбләғ аҗратқан.

Лекин 2017-йилдин бурун уйғур дияриниң җәнубидики районларниң тор сүритини 2G ға чүшүрүп қойған хитай даирилириниң, 2019-йилдин башлап районда 5G қурулушини тез сүрәттә кеңәйтиши көзәткүчиләрниң диққитини қозғиған. Көзәткүчиләр, уйғур диярида 5G тор қурулушиниң омумлишиши уйғурларға қарита техиму қаттиқ, техиму тәпсилий вә техиму тез назарәт механизми шәкилләндүридиғанлиқини илгири сүрмәктә.

Хитай һөкүмити йеқинда бу қурулушқа 2 милярд сом аҗратқанлиқи, бу йил районда 5 миңға йеқин 5G алақә мунари қуридиғанлиқини җакарлиғаниди.

Шинхуа агентлиқиниң билдүрүшичә, нөвәттә үрүмчи шәһиридики асаслиқ районларда 2379 алақә мунари қурулған. Буниң ичидики 1861 алақә мунари бу йил ичидә қурулғаникән. Үрүмчидики алақә мунарлириниң қурулуши хитайниң «җуңго көчмә телефон ширкити» гә һөддигә берилгән. Уйғур дияриниң 5G тор қурулуши «җуңго көчмә телефон ширкити» қатарлиқ 3 хитай тор алақә ширкитигә һөддигә берилгәниди.

Пикирләр (0)
Share
Толуқ бәт