Xitayning amérika üchün xeterlik reqib ikenliki tekitlenmekte

• Muxbirimiz eziz
  2019-01-15

Bir qisim analizchilar izchil “Dunyaning eng chong emgek baziri” dep teriplep kéliwatqan xitayning yene bir yaqtin amérika üchün yoshurun xewpi ghayet zor derijide éshiwatqan reqib ikenliki yéqindin buyan qayta-qayta tekitlinishke bashlidi. “Nyu-york waqti géziti” ning 14-dékabir sanida dérék sissor we deniyél bloméntay imzasida élan qilin'ghan mushu heqtiki maqale ene shu xil qarashlarning eng yéngisi hésablinidu.

Aptorlar amérika “Karxanichiliq instituti” ning aliy tetqiqatchiliri bolup, ularning qarishiche amérika hökümiti 2017-yilila xitayning “Réwiziyonizimchi küch” ikenlikini hemde bu küchning xelq'ara tertipni öz menpe'etige uyghun tertipte qaytidin qurup chiqmaqchi boluwatqanliqidin toluq xewerdar bolghan. Yene kélip xitayning herbiy kéngeymichiliki, amérikining tesir da'irisini ajizlashturush urunushliri, amérikining ittipaqdishi bolghan kanadadin rehimsizlik bilen “Qisas élishi” qatarliqlarmu xitayning ashu xaraktérini ashkarilawatqan bolsimu amérika hökümiti buninggha qandaq inkas qayturushta bir qarargha kélelmigen.

Aptorlar birdek tekitligen bir muhim nuqta amérika bu xil haletke taqabil turush üchün xitay bilen bolghan bir qisim iqtisadiy munasiwetni qisqartishi yaki tengshishi lazim. Shundaq qilghandila eqliy mülük oghriliqining aldini alghili, xitay armiyesining jan tomurigha zerbe bergili, shuningdek xitaydiki insan heqliri depsendichilikige, bolupmu zor kölemlik nazaret méxanizmigha ariliship qalghan shirketlerning tizginini tartqili bolidu.

Ularning pikriche, amérikining xitaygha qiliwatqan éksporti amérikining milliy ishlepchiqirish omumiy qimmitining bir pirsentigimu yetmeydu, xitaydin qiliwatqan import miqdari aziyip ketse buning ornini tolduralaydighan köpligen memliketler bu xil soda shériklikining ornini basalaydu. Yene kélip bu soda shérikliri héchqachan amérika üchün xeter shekillendürmeydu. Shunga xitay bilen bolghan soda munasiwitide tamozhna béjini tetbiqlash aqilanilik emes. Eksiche, xitay bilen bolghan soda munasiwitini qaytidin tengshesh we qisqartish zörür.