“вол-стрет журнили” гезити: “б д т инавитини сақлап қалимән десә, бачелетни вәзиписидин елип ташлиши керәк”

Мухбиримиз әркин
2022.06.13
Share on WhatsApp
Share on WhatsApp

Американиң “вол-стрет журнили” гезитидә 12-июн елан қилинған бир обзорда, әгәр б д т өзиниң инавитини сақлап қалимән дисә, б д т кишилик һоқуқ алий комиссариниң вәзиписидин айрилиши керәкликини билдүргән. Мәзкур гезитниң обзорчиси марий анастасия оградий қәләмгә алған мәзкур обзорда ейтилишичә, әмәлийәттә кишилик һоқуқ алий комиссари мишел бачелет кишилик һоқуққа анчә көңүл бөлмәйдикән.

Обзорда униң өткән айдики хитай зияритидә хитайниң тәшвиқатини қилғанлиқи, буниң һәйран қаларлиқ әмәсликини, чүнки бурун куба үчүн уруш қилған бачелетниң соғуқ уруш дәвридә сабиқ совет иттипақи тәрәптә турғанлиқи вә куба инқилабиниң мәстаниси икәнлики, кишилик һоқуқ униң иши әмәсликини билдүргән.

Марий анастасия ‍оградийниң “б д т ниң диктаторлар кәчүрүмчиси” мавзулуқ обзори өткән һәптә дунядики 200 дин артуқ ‍аммивий тәшкилат бачелетниң истепа беришини тәләп қилишиниң арқисидин, шундақла бачилет 13-июн күни өзиниң йәнә бир нөвәтлик б д т кишилик һоқуқ алий комисарлиқини талашмайдиғанлиқини җакарлишидин бир күн бурун елан қилинған.

Бирләшмә агентлиқиниң хәвәр қилишичә, вәзипә өтәш муддити бу йил 31-авғустта тошудиған бачелет, 13-июн күни б д т кишилик һоқуқ кеңишиниң яз пәсиллик йиғининиң ечилишида өзиниң юқириқи қарарини елан қилған.

Тәнқидчиләр, хитай зиярити мәзгилидә бачелетниң уйғурлар һәққидә йетәрлик сөзлимигәнлики, хитай даирилиригә йетәрлик бесим қилмиғанлиқи, униң бу сәпиридә пәқәт хитайниң юқири дәриҗилик даирилири билән алақә қанили ачқанлиқини билдүргән иди. Бирләшмә агентлиқиниң ейтишичә, бачелет дүшәнбә күни өзиниң хитай зияритигә аит йеңи тәпсилатларни тәминләп, шинҗаңдики уйғур вә башқа мусулман аз санлиқ милләтләргә қаритилған халиғанчә тутуп туруш вә “хорлаш әндизиси” гә болған әндишилирини оттуриға қойғанлиқини ейтқан. Бирақ марий анастасия оградийниң тәкитлишичә, бачелетниң “мәйли кубада яки хитайда болсун, залимларға һесдашлиқ қилиду, дегән тәсиридин қечиш қийин болуп, б д т өзиниң инаветини сақлап қалмақчи болса, униң вәзиписидин айрилиши керәк,” икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт