Уйғурлар дияридики бихәтәрлик хираҗити шиддәт билән ашмақта

Мухбиримиз әзиз
2018-11-06
Елхәт
Пикир
Share
Принт

Хитай һөкүмитиниң уйғурлар дияридики бихәтәрликкә сәрп қиливатқан хираҗәтниң 2017-йилиниң ичидә өткән мәзгилдикигә қариғанда үч һәссә ашқанлиқи дуняни йәнә бир қетим һәйран қалдурди.

Ройтерс агентлиқиниң 6-ноябирдики хәвиридә ейтилишичә, уйғурлар дияридики бихәтәрликкә четишлиқ хираҗәтниң омуми миқдари 2017-йили 20 милярд сом (үч милярд америка доллириға йеқин), йәни 213 пирсәнт ашқан.

Мәзкур хуласини америкидики җеймис тавн фондиниң хадимлири хитай һөкүмити елан қилған хам чот һәққидики түрлүк санлиқ мәлуматлар вә алақидар қурулушларға сәрп болған хираҗәтләр асасида һесаблап чиққан.

Мәзкур доклатни тәйярлап чиққан германийәлик мутәхәссис адрян зенз бу һәқтә тохтилип «бу хираҗәтләр ‹кәспий техника мәктәплири' гә әмәс, бәлки йүз миңлиған уйғурлар қамалған ‹тәрбийәләш лагерлири' қурулушиға һәмдә буниң нормал айлинишиға сәрп болған» дәп көрситиду. Шуниңдәк бу лагерларда қандақ дәрсләрниң өтүлүшидин қәтийнәзәр буларниң башқурулуши яки хираҗәт сәрп қилинишиниң һечқандақ «кәспий тәрбийәләш» кә охшимайдиғанлиқини тәкитлигән.

Чнн ниң 6-ноябирдики хәвиридә ейтилишичә, бу хил зор ешиш «тутуп туруш орунлирини башқуруш» вә «әдлийә системиси»ни қамдаш қатарлиқ «ички бихәтәрлик чиқимлири»ға сәрп болған. Йәнә келип алақидар санлиқ мәлуматлар уйғурлар дияридики һәқиқий «кәспий тәрбийәләш мәктәплири»ниң хираҗити 2017-йилиниң өзидә йәттә пирсәнт төвәнләп кәткәнликини ишарә қилидикән.

Хитай һөкүмәт тармақлири ройтерс агентлиқиниң бу һәқтики соаллириға җаваб бәрмигән. Хитай ташқи ишлар министирлиқиниң баянатчиси хуа чүнйиң «шинҗаңниң бихәтәрлик хираҗити һәққидә мәлуматлиқ әмәсмән» дәп җаваб бәргән.

Пикирләр (0)
Share
Толуқ бәт