Merkiziy axbarat idarisining neziri xitaygha tikilishke bashlidi

Amérika-xitay munasiwitining barghanséri yamanlishishigha egiship yéqinda amérika merkiziy axbarat idarisi (CIA) özining asasiy diqqitini xitaygha qaritiwatqanliqini ipadiligen. Shuningdek buning amérika armiyesi afghanistandin chékinip chiqqandin kéyinki bir yéngi yüzlinish bolup qalidighanliqini tekitligen.

Birleshme agéntliqning 8-awghusttiki xewiride éytilishiche, merkiziy axbarat idarisining mu'awin bashliqi déywid ko'én (David Cohen) bu heqte söz qilip: “Talibanlargha we bashqa térrorchi küchlerge qarshi turush bizning muhim wezipimiz. Emma bizning adem küchi we maliye küchimiz téximu bekrek xitaygha merkezlishishi lazim” dégen. U bu sözni talibanlarning 2-nomurluq kattiwéshi ayman zawahiri (Ayman al-Zawahri) yéqinda kabuldiki hawa hujumida öltürülgendin kéyin éytilghan. Yene kélip amérika kéngesh palatasining re'isi nensiy pélosi teywenni ziyaret qilghanda xitay hökümitining herbiy jehette amérika hökümitige heywe körsitishimu nöwette xitayning talibanlardinmu bekrek tehdit ikenlikini namayan qilghan. Yene kélip yillardin buyan xitay hökümitining siyasiy, iqtisad we pen-téxnika sahesidiki jasusluq qilmishlirimu amérika hökümitining xitay heqqidiki chüshenchisini zor derijide özgertken.

Melum bolushiche, merkiziy axbarat idarisining bu qarari amérika dölet mejlisidiki herqaysi zatlarningmu qollishigha érishken. Awam palatasining ezasi jéyson krow (Jason Crow) bu heqte söz qilip: “Rusiye we xitay biz üchün zor tehdit. Emma térrorchilar amérikani weyran qiliwételmeydu. Lékin hushyar bolmisaq xitay bizni weyran qiliwétishi mumkin” dégen.