Даңлиқ артист мя фарров уйғурларни һемайә қилидиғанлиқини билдүрди

Мухбиримиз әзиз
2021.11.24

Хитай һөкүмитиниң уйғур дияридики қирғинчилиқи барғансери көп саһәгә билиниватқан болуп, авам пуқраларниң “инсанийәткә қарши җинайәт” дәп қариливатқан бу қилмишларни әйибләш сепи йеқиндин буян тәдриҗи шәкиллинишкә башлиди. Васкетбол саһәсидики бир қисим чолпанлардин кейин, һолливудниң дуняға даңлиқ кона артиси, шуниңдәк көпчиликкә тонулған паалийәтчи мя фарров ханим 23-күни өзиниң тиветтер бетидә баянат елан қилип: “уйғурларни қирғин қиливатқан хитайдәк бир дөләт қандақму олимпик мусабиқисигә саһибхан болалисун?” дегән.

Америка башчилиқидики бир қисим ғәрб дөләтлири хитай һөкүмитиниң уйғурларни қирғин қилишидәк реаллиққа қарши бир қатар җаза тәдбирлирини елан қилғандин кейин, хәлқарада 2022-йилиниң бешида бейҗиңда өткүзилидиған қишлиқ олимпик мусабиқисини байқут қилиш, шу арқилиқ хитай һөкүмитиниң қәбиһ җинайәтлирини йәнә бир қетим җазалаш чуқанлири көтүрүлгән иди. Хәлқарада зор һөрмәткә игә мя фарров ханимниң бу сәпкә қошулуши һәмдә уйғурларни һемайә қилиши, муһаҗирәттики уйғурларни вә уйғурларни қоллиғучи һәр саһә кишилирини бәкму сөйүндүрди.

Мәлум болушичә, бу йил 76 яшқа киргән мя фарров ханим 1960-йиллири һолливуд филимлиридә рол елишни башлиған болуп, һазирғичә 50 нәччә филимдә муһим ролларни алған. У йәнә рол елиштики өзгичә таланти билән һолливудниң көплигән алий мукапатлириға еришкән икән. Кейинчә болса бирләшкән дөләтләр тәшкилатиниң “езгү тиләк әлчиси” болуп судан, оттура африқа қатарлиқ җайлардики қирғинчилиқ вә ичкий уруш мәсилилирини тинчлиқ билән һәл қилишқа төһпә қошқан. 2008-Йили “дәвр” журнили уни “дунядики әң зор тәсиргә игә шәхсләрниң бири” дәп елан қилған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.