Әрдоған хитай мухбирниң шәрқи түркистан тоғрилиқ соалиға күтүлгән җавабни бәрмигән

Мухбиримиз шөһрәт һошур
2016-09-05
Share

Түркийә авази радиосиниң бүгүнки уйғурчә хәвиридин мәлум болушичә, 20 дөләт башлиқлири йиғиниға қатнишиватқан түркийә дөләт рәиси рәҗәп таййип әрдоған бир хитай мухбирниң шәрқи түркистан тоғрилиқ соаллириға күтүлгән нәқ җавабни бәрмигән.

Хәвәрдә дейилишичә, хитай мухбир әрдоғанға "сиз хитай дөләт рәиси ши җинпиң билән өткүзгән учришишиңизда ‹шәрқий түркистан' мәсилиси тоғрисида сөзләштиңизму? у йәрдики ислами һәрикәтләр тоғрисида сөзләштиңизму? хитай билән террорлуққа қарши күрәштә һәмкарлиқ орнитиш бойичә рошән һалда қандақ ишларни қилисиз? болупму, түркийәдики хитай пуқралириниң түркийәдики зораванлиқ вәқәлириниң тәсиригә учримаслиқини капаләткә игә қилиш үчүн қандақ ишларни қилисиз?" дегән соаллириниң һечйиригә ениқ вә нәқ җаваб бәрмигән.

Пәқәт түркийәниң зораванлиқ вә террорлуқниң һәрқандақ шәклигә, һәрқандақ җайда қарши туридиғанлиқини вә ши җинпиң билән бу һәқтә сөзләшкәнликини ейтқан.

Әрдоған җавабида шәрқи түркистандики вәқәләр яки шәрқи түркистан күчлирини тилға алмиған, пәқәт ирақ ислам дөлити тәшкилатиниң исламға вәкиллик қилалмайдиғанлиқи һәққидә тәпсилий тохталған. У мухбирниң соалидики хата уқумға рәддийә берип "ислами һаят билән террорлуқ вәқәлириниң бир-биригә бағланмаслиқи лазим" лиқини әскәрткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт