Galagér bilen krishnamorti wolkiswagénni Uyghur diyaridin chékinip chiqishqa chaqirdi

Amérika awam palatasi xitay istratégiyelik riqabet alahide komitétining re'isi maykél galagér bilen bu komitétning mes'ul ezasi raja krishnamorti 21-féwral wolkiswagén'gha mektup ewetip, uning 2013-yildin béri Uyghur diyarida meshghulat élip bériwatqan zawutini taqashqa chaqirghan. Galagér bilen krishnamortining wolkiswagén ijra'iye diréktori oliwr blumgha yézilghan mektupi, wolkiswagén guruhining minglighan aptomobili yéqinda amérika chégra qoghdash we tamozhna idarisi teripidin chégrada toxtitip qoyulushidin kéyin yollan'ghan. Melum bolushiche, amérika chégra qoghdash we tamozhna idarisi “Uyghur mejburiy emgikining aldini élish qanuni” boyiche minglighan aptomobilni zapchasliri Uyghur mejburiy emgikige chétishliq, dégen guman bilen toxtitip qoyghanidi.

Mektupta “Biz shundaqla yene wolkiswagénni amérika hökümiti, ‛xitay kompartiyesi Uyghur we bashqa az sanliq milletlerge irqiy qirghinchiliq qilmaqta‚ dep békitken shinjangdiki meshghulatini toxtitishqa chaqirimiz” déyilgen. Mektupta tekitlinishiche, yéqinda élan qilin'ghan doklatlar wolkiswagénning mejburiy yötkelgen Uyghur emgek küchlirini ishlitip, her xil eslihelerni qurushta hem bashqurushta qollan'ghanliqini körsetmekte iken. Mektupta yene wolkiswagénning xitayning “Namratliqtin qutquzush pirogrammisi” gha qatnashturulghan Uyghur emgek küchlirini ishletkenliki qeyt qiliniwatqanliqini bildürgen.

Mektupta mundaq déyilgen: “Wolkiswagénning teminlesh zenjiridiki mejburiy emgekke a'it delilleshler, shundaqla uning shinjangda dawamlishiwatqan meshghulatining türtkiside, biz wolkiswagénning shinjangdiki barliq meshghulatlirini derhal toxtitishqa we uning ‛Uyghur mejburiy emgikining aldini élish qanuni‚ gha emel qilish tirishchanliqini kücheytishke chaqirimiz.”

 Wolkiswagén uzundin béri kishilik hoquq teshkilatlirining ürümchidiki zawutini taqash chaqiriqlirigha pisent qilmay kelgen bolsimu, lékin yéqinda uning turpandiki aptomobil sinaq meydani qurulushida Uyghur mejburiy emgek küchlirining ishlitilgenlikige da'ir deliller uni téximu ongaysiz ehwalgha chüshürüp qoyghanidi. Melum bolushiche, galagér bilen krishnamorti wolkiswagénning özlirige 5-marttin burun jawab bérishini telep qilghan.