Kishilik hoquq közitish teshkilati guma partlash weqesi üstidin tekshürüsh élip bérishni telep qildi

Dunyadiki nopuzluq kishilik hoquq organliridin kishilik hoquq közitish teshkilati xitay da'irilirini 10‏-séntebir guma nahiyiside yüz bergen partlash weqesi üstidin terepsiz we ishenchlik tekshürüsh élip bérishqa chaqirdi.

Kishilik hoquqni közitish teshkilati peyshenbe küni élan qilghan bayanatida yene,gumandarlarning hoquqigha hörmet qilishni telep qilghan.

10‏-Séntebir, saqchilar xotenning guma nahiyisi köktérek yézisidiki bir öyde aqturush élip barghanda bomba partlap, nahiyilik saqchi idarisining mu'awin bashliqi gheyret mamut ölgen, 3 saqchi yarilan'ghan. Yaridar saqchilarning doxturxanida ölgenliki ilgiri sürülgen idi.

Da'iriler, bomba saqchilarning “Qara tizimlik”tiki bir a'ilini tekshürüwatqanda partlighanliqini bildürgen. Emma bomba partlighan öydiki a'ile ezalirining aqiwiti, partlashtin kéyin qolgha élin'ghan kishiler heqqide héchqandaq uchur bermigen.

Kishilik hoquq közitish teshkilati, xitay hökümitining ammiwi bixeterlikni qoghdash mes'uliyiti bolsimu, emma uning yene, jinayet gumandarlirigha xelq'ara ölchemler asasida mu'amile qilish mejburiyiti barliqini eskertip, “Héchkim orunsiz yaki chékidin ashqan küch qollinip tutqun qilinmasliqi kérek” dégen.

Xitay amanliq küchliri izchil Uyghurlargha chétishliq zorawanliq weqeliride qanun tüzümni qayrip qoyup, chékidin ashqan küch ishlitish, xelq'ara ölchem we ehdinamilerge xilapliq qilish bilen eyiblinip kelgen.