Ваң мең: уйғур райондики егиз - пәс иқтисадий тәрәққият йәрликләрни нарази қилиду

Хитайниң сабиқ мәдәнийәт министири ваң мең уйғурларни “радикал мусулманлар әмәс” дәп көрсәткән вә районда йолға қоюлған егиз - пәс иқтисадий тәрәққиятниң йәрликләрни дүшмәнләштүриватқанлиқини билдүргән.

У, бу сөзләрни хоңкоңдин чиқидиған “җәнубий хитай әтигәнлик почта гезити” ниң зияритини қобул қилғанда оттуриға қойған.

Ваң мең 1963 - йилидин 1978 - йилиғичә уйғур елиниң ғулҗа шәһиридә яшиған. У 1986 - йили хитайниң мәдәнийәт министири болуп тәйинләнгән, әмма 1989 - йилидики тйәнәнмен қирғинчилиқидин кейин вәзиписидин елип ташланған.

У, уйғурларниң меһрибан, достанә хәлқ икәнликини көрсәткән һәмдә мутләқ көп қисим уйғурларниң радикал әмәсликни тәкитлигән.

Әмма у, районда йолға қоюлған иқтисадий тәрәққият мевилиридин уйғурларниң чәттә қалдурулғанлиқини юмшақ усулда оттуриға қойған.

У мундақ дегән: “мәлум җәһәттин ейтқанда, җиддий иқтисадий тәрәққият вә заманивилаштуруш өзиниң әнәниви мәдәнийити вә турмуш усулини қоғдашни халайдиған йәрликләрдә адавәт пәйда қилған.”

Бу нуқта кишилик һоқуқ тәшкилатлири вә уйғур ели вәзийитини көзәткүчилириниң баянатлиридиму оттуриға қоюлған иди.

Улар хитай һөкүмитини уйғур райониға қаратқан миллий, диний вә иқтисадий сиясәтлирини өзгәртишкә, уйғурларниң наразилиқни қозғаватқан амилларға бәкрәк диққәт ағдурушқа чақирип кәлгән.

Һалбуки, хитай һөкүмити миллий сияситигә қарап чиқишниң орниға, уйғурларға қаритилған бастуруш сияситини техиму күчәйтишкә башлиған иди.