Iran wekilliri ömiki Uyghur aptonom rayoni bilen munasiwitini kücheytidighanliqini bildürgen

7-Ayning 3-küni Uyghur rayonigha ziyaretke kelgen iran dölet menpe'etini belgilesh komitéti tekshürüsh ömiki aptonom rayonluq partkom sékrétari ma shingruy, hökümet re'isi erkin tunyaz qatarliqlar bilen körüshken.

Xitayche “Tengritagh tori” , “Shinjang géziti tori” ning bu heqte bergen xewirige qarighanda, irandin kelgen bu ömekning ziyariti aldinqi ayning axirida ürümchide ötküzülgen 8-nöwetlik xitay-yawro asiya soda yermenkisige qatnashqan iran soda wekilliri ömikining ziyaritidin kéyinla élip bérilghan. Ma shingruy ulargha qilghan sözide, bu qétimqi soda yermenkisige aktipliq bilen qatnashqan iranning “Shinjang bilen téximu keng munasiwet ornatqanliqi, néfit-tebi'iy gaz énérgiyesi, xewpsizlik we medeniyet saheliride öz'ara hemkarliqni kücheytkenliki” ni bildürgen. Ma shingruy yene iran bilen xitayning her ikkisining soda cheklimisige uchrighan döletler ikenlikini, amérika we bezi gherb döletlirining “Shinjang mesiliside xitayni qarilighanliqini, yalghan-yawdaqlarni toqup xitaygha soda cheklimisi qoyghanliqi” ni, bu ehwalda iran bilen téximu qoyuq hemkarliship, ortaq tereqqiyat berpa qilish kéreklikini tekitligen.

Iran dölet menpe'etini belgilesh komitétining dölet mudapi'esi we xewpsizlik ishlirigha mes'ul re'isi nizamipir ikki terep söhbitide qilghan sözide, Uyghur rayonining xitay bilen ottura asiya döletliri otturisidiki alaqe we hemkarliqning derwazisi we muhim yoli ikenlikini, Uyghur rayoni bilen alaqe we hemkarliqni ilgiri süridighanliqini bildürgen.

Iran izchil halda xitayni qollap kéliwatqan döletlerning biri bolup, xitayningmu iranni öz yénigha tartip, amérikagha qarshi birlik sep qurushqa urunuwatqanliqi melum. Amérika sherq-gherb tetqiqat merkizining aliy tetqiqatchisi diniy roy (Denny Roy) yéqinda élan qilghan “Ghezze némishqa shinjangdin köp diqqet qozghaydu” namliq maqaliside, hazir Uyghurlar uchrawatqan irqiy qirghinchiliq jinayitini inkar qilip, xamasni qollawatqan rusiye, iran, shimaliy koréye qatarliq döletlerning xitay bilen birliship, mustebit döletler ittipaqi shekillendürüwatqanliqini otturigha qoyghanidi.