Xelq'ara metbu'atlarda ju yüngkanggha chétishliq yéngi jinayi pakitlar ashkarilandi

Xitay siyasiy qanun komitétining sabiq bashliqi ju yüngkangning tutqun qilin'ghanliqi heqqidiki xewer tarqalghandin buyan, ju yüngkang we uning a'ile jemeti, yéqinlirining jinayi qilmishlirigha a'it téximu köp xewerler ashkarilanmaqta.

Mingjin tor géziti, teywende chiqidighan merkizi xewerler agéntliqi, xongkongda chiqidighan alma géziti qatarliqlarning xewerliride, ju yüngkangning özi yalghuz xiyanet qilghan pul sommisining 100 milyard somgha yétidighanliqi, uning kichik apisi we hazirqi ayali kontrol qilghan xitay néfit sahesidin ju jemeti toplighan bayliqning hésabi yoqluqi élan qilinip, eger xitay hökümiti ju yüngkanggha jinayi jaza békitse, uning ilgiriki ayalini qestlep öltürüsh, xitay re'isi shi jinpinggha ikki qétim qest qilishqa urunush, siyasiy özgirish qozghash qatarliq jinayetlirini hésabqa almighandimu, peqet parixorluq qilmishi üchünla ölümge höküm qilinishi mumkin iken.

Gérmaniye awazining düshenbe künidiki xewiride, ötken hepte qolgha élin'ghan xitay jama'et xewpsizlik ministirining mu'awin bashliqi li dungshéngningmu ju yüngkanggha para bergini üchün hazirqi emilige érishkenliki tilgha élindi.

Xitayning hökümet metbu'atlirida 24-dékabirgha qeder ju yüngkangning qolgha élin'ghanliqi heqqide héchqandaq xewer bérilmidi. Emma xitay hökümet metbu'atliri xewerliride, 2013-yili 9-aydin bashlap xitay néfit sahesidiki 4 chong emeldar we ilgiri ju yüngkang a'ilisining yéqini dep qarilip kéliwatqan bir qisim emeldarlarning qolgha élin'ghanliqi yaki tekshürülüwatqanliqi heqqide xewerler tarqalghan idi.