Xelq'ara kechürüm teshkilati: süriye hökümitining bir herbiy türmiside 13 ming adem mexpiy öltürülgen

Xelq'ara kechürüm teshkilati seyshenbe küni doklat élan qilip, süriye hökümitining saydnaya herbiy türmiside 13 ming ademni mexpiy dargha ésip öltürülgenlikini bildürdi. Doklatta qeyt qilishiche, öltürülgenlerning köp qismi öktichilerni qollaydighan puqralar iken.

Doklatta, saydnaya türmisidiki tutqunlar 2011‏-yildin 2015‏-yiligha qeder her heptisi kolléktip dargha ésilghan. Xelq'ara kechürüm teshkilati, dargha ésish buyruqi yuqiri derijilik süriye emeldarliri teripidin chüshürülgenlikini ilgiri sürgen. Süriye hökümiti ilgiri tutqunlarni öltürgenliki we ulargha qopal mu'amile qilghanliqini izchil ret qilip kelgen idi. B d t kishilik hoquq mutexessisliri buningdin bir yil awwal guwahchilarning bayani we bezi höjjetlik delillerge asasen minglighan, on minglighan puqraning tutqun qilin'ghanliqi we “Keng kölemlik kolléktip öltürüsh weqeliri” ning yüz bergenlikini ilgiri sürgen idi.

Xelq'ara kechürüm teshkilati bu doklatni teyyarlashta sabiq qoghdash xadimi, tutqun we saydnaya türmiside ishligen emeldarlardin 84 kishini ziyaret qilghan. Bu kishiler, mezkur türmide her heptide, arilap heptide ikki qétim 20 din 50 kéche tutqunning kolléktip dargha ésilidighanliqini bildürgen. Lékin doklatta qeyt qilishiche, süriye hökümitining 2015‏-yili dékabirdin kéyin öltürüshni dawamlashturghanliqigha da'ir delil bolmisimu, emma buni toxtatqanliqigha ishinishke héchqandaq seweb yoq iken.

Xelq'ara kechürüm teshkilati buning urush jinayiti we insaniyetke qarshi turush jinayitige kiridighanliqini bildürgen.