Шаһит қәлбинур сидиқ хитайниң «қошмақ туғқан» сияситиниң җинсий паракәндичилик маһийитини ашкарилиди

Мухбиримиз әркин
2020-09-21

Голландийәдә яшатқан лагер шаһити қәлбинур сидиқ «зимистан» торида хитайниң «қошмақ туғқан» сияситиниң җинсий паракәндичилик маһийитини ашкарилап, уйғур аилилиригә әвәтилгән хитай «туғқанлар» ниң ич йүзини паш қилған. «Зимистан» ториниң тәкитлишичә, «қошмақ туғқан» сияситиниң зиянкәшликигә учриған һәр бир уйғур аял вә қизиниң нәзиридә бу «түзүм характерлик басқунчилиқ вә җинсий паракәндичиликтин башқа нәрсә әмәс,» икән.

Өткән йили 12-айда явропаға қечип чиққан қәлбинур сидиқ «зимистан» торида өзлиригә қошуп берилгән әркәк хитай «туғқини» ниң шәхсий турмушиға қистурулуп кирип, уларни қандақ назарәт қилидиғанлиқи, қандақ җинсий паракәндичиликләрни салғанлиқи, униң әхлақсиз һәрикити вә тәләплиридин қандақ қилип әпчиллик билән қечип қутулғанлиқлирини тәпсилий баян қилған. Униң тәкитлишичә, әгәр униңға қошулмайдиғанлиқини чандуруп қойса, у дәрһал уларни әйиблийәләйдикән.

«Зимистан» ториниң тәкитлишичә, қәлбинур сидиқ шундақ болсиму, лекин өзиниң әһвалини җәнубтикиләрдин яхширақ, дәп қариған. Хәвәрдә җәнубтики уйғур әрлириниң көпинчисиниң лагерларға елип кетилгәнлики, аяллар вә қизларниң ялғуз қалғанлиқи тәкитләнгән. Хитай һөкүмити уйғур диярида 2017-йили башланған чоң тутқан билән биргә «қошмақ туғқан» сияситини кеңәйткән.

Бир милйон 200 миң хитай кадири уйғур аилилиригә орунлаштурулуп, уйғурларниң «турмушта, тамақ етиштә, тамақ йейиштә, өгиништә вә ухлашта биргә болуши» тәләп қилинған. Кишилик һоқуқ тәшкилатлири хитай даирилириниң бу һәрикитини уйғур аилилиригә қилинған еғир бузғунчилиқ, «һөкүмәтниң қоллишида басқунчилиққа йол ечип бериш,» дәп әйиблигән иди.