Ma shingruy mexsus maqale élan qilip, xitayning Uyghur rayonidiki siyasiy istratégiyesini sherhiyligen

Muxbirimiz irade
2022-04-21
Share

Uyghur aptonom rayonluq partkomning sékritari ma shingruy 21-april küni xitay kompartiyesining organ géziti bolghan “Xelq géziti” de mexsus maqale élan qilip, xitayning Uyghur rayonidiki nöwettiki siyasiy istratégiyesi we uning konkirét halqilirini sherhiyligen.

U “Uniwérsal dölet xewpsizliki nuqti'iynezerini chongqur izchillashturup, shinjangning ijtima'iy muqimliqi we ebediy eminlikini mustehkem kapaletke ige qilish qilayli” namliq bu bash maqalisida: “Shinjang Uyghur aptonom rayonining ijtima'iy muqimliqi we uzun muddetlik eminliki, islahat, tereqqiyat, wetenning birliki, milletler ittipaqliqi, dölet xewpsizliki we jungxu'a millitining büyük güllinishidin ibaret zor istratégiyelik qurulushlar bilen zich munasiwetlik,” dep körsetken. U maqaliside Uyghur rayonida hazirghiche ijra qiliniwatqan atalmish “Térroluq, ashqunluq we bölgünchilik” ke qarshi yoqiri bésimliq siyasetlerni boshashmay dawamlashturushning zörürlükini tekitligen.

Ma shingruy maqaliside istratégiyilik tepekkur arqiliq dölet xewpsizlikini pilanlash we orunlashturush؛ siyasiy-qanun tepekkurini qollinish arqiliq siyasiy bixeterlikni qoghdash؛ sistémiliq tepekkur usuli arqiliq sirtqiy küchlerning singip kirishining aldini élish؛ di'aléktikiliq tepekkurni qollinip, tereqqiyat bilen bixeterlikni maslashturush؛ eng töwen chek (qizil siziq) tepekkuruni qollinip, xeterning aldini élish we xirisni yoqitish qatarliq 5 nuqta boyiche xitayning Uyghur rayonidiki siyasiy istratégiyesini sherhiyligen.

U maqaliside mundaq dep yazghan: “Shinjang dölitimning gherbiy shimalidiki muhim bixeterlik tosiqi, shinjangning alahide istratégiyelik orni we alahide mesililiri mewjut. Shunga shinjangda xizmetlerni yaxshi qilish intayin muhim. Biz shinjang xizmitini istratégiyelik nuqtidin közdin kechürüsh we pilanlashta ching turushimiz, jungxu'a millitining büyük güllinishidin ibaret bu omumiy nishanning omumiy istratégiyelik weziyitini inchike közitishimiz, dunyadiki yéqinqi bir esirde körülüp baqmighan zor özgirishlerge ehmiyet bérishimiz kérek. Shinjangda dölet bixeterlikini qoghdashning herqaysi terepliri we pütkül jeryanlirini estayidil orunlashturup, dölet xewpsizliki mes'uliyet sistémisini qattiq yolgha qoyushimiz kérek.”

Ma shingruy maqaliside yene hazirghiche Uyghur rayonida élip bérilghan keng kölemlik tutqun, “Qayta terbiyelesh” namidiki lagérlargha solash herikitini qet'iy dawamlashturushni we uni qanuniy asasqa ige qilishni tekitlep, mundaq dep yazghan: “Shinjangda qanun bilen idare qilishni shinjang xizmitining barliq saheliride yolgha qoyup, milliy bölgünchi, diniy ashqun we zorawan térorluq küchlirini qanun boyiche qattiq basturup, shinjangning muqimliqi we jem'iyetning bixeterlikini qet'iy qoghdishimiz kérek. Bölgünchilikke qarshi turush kürishini chongqur qanat yaydurup, shinjangning bölgünchilikke qarshi turush kürishining uzun muddetlik, murekkep we japaliq mahiyitini chongqur chüshinip, pütkül jem'iyette bölgünchilikke qarshi turush terbiyesini dawamliq chongqurlashturup, sirtqiy küchlerning singip kirishning aldini élishimiz we uninggha zerbe bérishimiz kérek. Dölet ichi we sirtidiki düshmen küchlerning millet, din mesililirini destek qilip, bölgünchilik, singip kirish we buzghunchiliq heriketliri élip bérishigha qet'iy qarshi turushimiz kérek. Chet ellerdiki xitaygha qarshi küchlerning ‛shinjang arqiliq xitayni kontrol qilish‚ pilanigha qet'iy qarshi turup, döletning igilik hoquqini qoghdishimiz kérek.”

Ma shingruy maqaliside yene “Jungxu'a milliti ortaq gewdisi”, “Dölet tili” “Milletlerning yughurulushi” we “Anarning danisidek zich uyushishi” dégendek bir qatar siyasiy términlarni ishlitip, rayondiki assimlatsiye siyasitini dawamliq kücheytishni, islam dinini xitaychilashturushtin ibaret kompartiyening din siyasitini yenimu chingitishni telep qilghan.

Chet ellerdiki közetküchiler, ma shingruyning “Xelq géziti” de élan qilghan bu maqalisigha jiddiy qarimaqta. Ular, ma shingruyning bu maqalisi xitay hökümitining Uyghur élidiki siyasiy istratyégiyesining ich yüzini éniq körsitip bergen, dep qarashmaqta. Ular yene ma shingruyning bu maqalisi Uyghur rayonining weziyitide bundin kéyin qilchimu yaxshilinish bolmaydighanliqi, eksiche rayondiki keng kölemlik tutqun, qayta terbiye we assimlatsiye qatarliq yuqiri bésimliq irqiy qirghinchiliq siyasetlirining téximu keng kölemde yürgüzülidighanliqidin dérek béridu, dep hésablimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet