Майик галлагер рәсмий һалда ма шиңруйгә җаза елан қилиш тәлипини оттуриға қойди

Вашингтондин мухбиримиз әзиз тәйярлиди
2023.09.19

Ройтерс агентлиқиниң 19-сентәбирдики хәвиридә ейтилишичә, америка дөләт мәҗлиси қармиқидики “америка-хитай истратегийәлик риқабәт пәвқуладдә комитети” ниң рәиси майк галлагер (Mike Gallagher) америка ташқи ишлар министири антони билинкен (Antony Blinken) вә вәтән бихәтәрлик министири алехандро майоркас (Alejandro Mayorkas) қа очуқ мәктуп йоллап, уйғур аптоном районлуқ парткомниң секретари ма шиңруйгә җаза елан қилишни тәләп қилған.

Уларниң тор бетидә елан қилинған очуқ мәктупта майик галлагер әпәнди айрим-айрим һалда 2020-вә 2021-йили рәсмий қанунға айланған “уйғур кишилик һоқуқ сиясити қануни” вә “уйғур мәҗбурий әмгикиниң алдини елиш қануни” ни қаттиқ иҗра қилишни тәләп қилған. Шундақла бу қанунлардики бәлгилимиләр бойичә уйғур дияридики қабаһәтләргә җавабкар болған хитай әмәлдарлириға җаза елан қилиш керәкликини тәкитлигән. Очуқ мәктупта галлагер әпәнди хитай һөкүмитиниң һазирму давам қиливатқан қирғинчилиқиниң сориқи болуши керәкликини, америка һөкүмити уйғурлар вә башқа милләтләргә қарши болған бу қилмишларни садир қиливатқан хитай әмәлдарлириниң сориқини қилиши лазимлиқини, шуниңдәк америка қошма штатлириниң хитай билән болидиған бир тәрәплимә вә тейиз алақисини дәпла өзлириниң әхлақий йетәкчилик орнини қурбан қиливәтсә болмайдиғанлиқини алаһидә әскәрткән.

Очуқ мәктупта әнә шу әһваллар бир-бирләп баян қилинғандин кейин: “мән алди билән ш у а р парткомниң секретари ма шиңруйгә җаза елан қилишиңларни тәләп қилимән. Чүнки ма шиңруй хитай компартийәсиниң уйғур мусулманлириға қарши һазирму давам қиливатқан қирғинчилиқини башламчи болуп әмәлгә ашурған кишиләрниң бири” дегән. Шуниңдәк биңтүән парткоминиң секретари ли йифей, үрүмчи шәһәрлик партком секретари хе җоңю, уйғур аптоном районлуқ парткомниң муавин секретари җаң чүнлин, уйғур аптоном районлуқ сиясий-қанун комитетиниң мудири ваң миңшән қатарлиқ 37 шәхс вә ширкәткиму юқирида тилға елинған икки қанунға бинаән җаза елан қилиш, ундақ болмиса буниң сәвәбини чүшәндүрүш тәлипини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.