Майк помпийо оттура асия дөләтлирини уйғур мәсилиси вә хитай тәһдити һәққидә агаһландурди

Мухбиримиз ирадә
2020.02.04
Share on WhatsApp
Share on WhatsApp

Америка ташқи ишлар министири майк помпейо 2-вә 3-феврал күнлири оттура асия дөләтлири ташқи ишлар министирлири билән учрашти. Америка авазиниң хәвәр қилишичә, бу учришишларниң әң муһим музакирә темиси хитай болған.

Хәвәрдә ейтилишичә, майк помпейо өзбекистанда 5 оттура асия дөлитиниң ташқи ишлар министирлири билән учришип, улар билән район бихәрлики, иқтисадий тәрәққияти вә енергийә қатарлиқ мәсилиләр бойичә сөһбәтләшкән. Арқидин у йәнә һәрбир ташқи ишлар министири биләнму айрим көрүшүп музакириләрдә болған. Хәвәрдә баян қилинишичә, бу учришишларда майк помпиейониң асаслиқ темиси хитайниң оттура асиядики тәсири мәсилиси болған. У учришишларда оттура асия дөләтлирини хитай билән һәмкарлашқанда еһтиятчан болуш, униң мәблиғигә һәдидин зиядә бағлинип қалмаслиққа чақирған шундақла хитайниң тиҗарәт әхлақи вә қәрз сиясәтлирини тәнқид қилған.

Һәммидин муһими, у оттура асия дөләтлири ташқи ишлар министирлири билән учрашқанда хитай һөкүмитиниң уйғур, қазақ қатарлиқ милләтләргә қиливатқан зулум сияситини алаһидә оттуриға қойған. У сөзидә “америка қошма штатлири барлиқ дөләтләрни бизгә аваз қошуп, зулумни аяғлаштуруш үчүн бесим қилишқа чақиримиз, шундақла хитайдин қечип чиққан бу милләтләргә қарита бихәтәр шараит вә мусапирлиқ һоқуқи яритип беришиңларни, инсан ғуруриға һөрмәт қилип, тоғра болғанни қилишиңларни сораймиз” дегән. 

Америка авазиниң хәвәр қилишичә, америка узундин буян оттура асия районида русийә вә хитай билән риқабәтләшмәсликтәк йол тутуп кәлгән болсиму, бирақ униң йеқиндин буян хитайни көпләп тәнқид қилип, оттура асия дөләтлирини хитай билән болған мунасивәтлирини көздин кәчүрүшкә дәвәт қилиши диққәт қозғайдикән. 

Майк помпейо қазақистан вә өзбекистандин ибарәт оттура асиядики икки муһим дөләт рәһбәрлири билән учрашқанда бу дөләтләрни иқтисадий вә сиясий җәһәтләрдин америка билән көпрәк һәмкарлишишқа чақирип, америкиға таянған сода вә тәрәққиятниң һәқиқий түрдә ишәнчлик вә узун муддәтлик икәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.