Натоға әза дөләтләр хитай тәһдитигә тақабил турушниң йоллири үстидә сөһбәтләшкән

Америка ташқий ишлар министири антоний билинкен, хитайниң һәрбий җәһәттә йошурунчә зорийийиватқанлиқи вә униң русийә билән болған һәмкарлиқиниң “шималий атлантик әһди тәшкилати” (NATO) дики иттипақдаш дөләтләрниң диққитини тартиватқанлиқини билдүргән.

У бу сөзләрни 30-ноябир роминийәдә ечилған натоға әза дөләтләр ташқий ишлар министирлириниң бир күнлүк йиғинида тәкитлигән.

У мундақ дегән: “иттипақдашлиримиз хитайниң мәҗбурлаш характерлиқ сиясәтлиридин, росийә билән болған һәмкарлиқидин, шундақла интайин тез вә әмма очуқ-ашкарилитин халий һәрбий җәһәттики зорийишидин гуманланмақта. 30-Ноябир күнидики йиғинда биз иттипақдашлиримиз билән бирлитә хитай пәйда қиливатқан риқабәтләргә тақабил турушниң конкирет йоллирини музакирә қилдуқ”

Ройтерс агентлиқиниң хәвиридә ейтилишичә, америка вә униң иттипақдаш дөләтлири һазир соғуқ уруштин кейинки йәнә бир қетимлиқ дуня тәртипини қайта шәкилләндүрүш риқабитигә дуч кәлгән. Шималий атлантик әһди тәшкилатиниң баш катипи җенс столтенберг (Jens Stoltenberg) му 1-декабир күни ечилған берлин хәвпсизлик йиғинида қилған сөзидә, хитайға охшаш мустәбит дөләтләргә иқтисадий җәһәттин тайинип қелишниң еғир ақивити һәққидә агаһландуруш бәргән.

У “украина уруши бизниң русийәниң тәбиий газиға тайинип қелишимизниң хәвпини намаян қилди. Мана бу бизниң хитайға охшаш башқа мустәбит һакимийәтләргә тайиништәк әһвалимизни қайтидин көздин кәчүрүшимизгә түрткә болуши керәк” дегән.

У йоқириқи бу сөзләрни явропа кеңишиниң рәиси чарлез мишел (Charles Michel) 1- Декабир күни бейҗиңда бир күнлүк зиярәттә болуватқан вә хитай рәһбири ши җинпиң билән көрүшкән мәзгилдә ейтқан.