Америка дөләт мәҗлиси әзалири хоңкоңлуқ демократийә паалийәтчилирини нобел тинчлиқ мукапатиға намзатлиққа көрсәтти

Мухбиримиз ирадә
2018-02-01
Елхәт
Пикир
Share
Принт

Америка дөләт мәҗлисиниң әзалири хоңкоңлуқ демократийә паалийәтчилиридин җашуа ваң, натан ло, алекс чу вә улар тәшкиллигән «күнлүк һәрикити» ни 2018 йиллиқ нобел тинчлиқ мукапатиға намзат қилип көрсәтти.

Фирансийә агентлиқиниң хәвәр қилишичә, америкиниң төт нәпәр кеңәш палата әзаси вә 8 нәпәр авам палата әзаси пәйшәнбә күни мәзкур қарарини җакарлиған. Улар норвегийәдики нобел комитетиға йоллиған мәктубида юқиридики яшларниң вә «күнлүк һәрикити» ниң тинчлиқ усули арқилиқ хоңкоң демократийисини қоғдап қелиш үчүн көрсәткән тиришчанлиқини муәййәнләштүргән һәмдә уларниң йәниму көп әркинлик паалийәтчилиригә илһам болуши керәкликини билдүргән. Улар, «юқириқи бу яшлар тәһдит, паракәндә қилиш, қолға елиш, қануний җазаға тартилиш қатарлиқ тәһдитләргә қарши җасаритини намаян қилди,» дәп язған. 

2014-Йили җашуа ваң қатарлиқлар тәрипидин тәшкилләнгән «күнлүк һәрикити» хоңкоңдики он миңлиған алий мәктәп оқуғучисиниң қоллишиға еришкән вә һәптиләрчә давам қилған иди. Оқуғучилар хоңкоңдики мәркизи тиҗарәт мәйданида сүкүттә олтуруш арқилиқ хоңкоңда хитай һөкүмитиниң тәсириниң күчийишигә қаршилиқ билдүргән. Бирақ хитай һөкүмити бу һәрикәтни хоңкоң сақчи күчлирини ишқа селиш арқилиқ бастурувәткән. Намайиш тәшкиллигүчиләрни көп қетим «қалаймиқанчилиқ чиқириш, тәртип бузуш» дегәндәк сәвәбләр әйиблигән. Җашуа ваңни 3 айлиқ қамақ җазасиға һөкүм қилған иди. 

Мәлум болушичә, хоңкоңдики демократийә паалийәтчилирини намзатлиққа көрсәткән америка дөләт мәҗлисиниң әзалири ичидә җумһурийәтчи әза марко рубийо, демократчи әза гәрий петерс қатарлиқ зор тәсиргә игә кишиләрму бар икән. 

Хитай һөкүмити тәрипидин өмүрлүк қамақ җазасиға һөкүм қилинған уйғур зиялийси илһам тохтиму явропа парламентиниң муавин рәиси фабио касталдо, парламент әзаси илхан күчүк, һелга трүпел, лазло токәс, игназио коррао қатарлиқлар тәрипидин нобел тинчлиқ мукапатиға намзат көрситилгән иди.

Пикирләр (0)
Share
Толуқ бәт