Хәлқара кәчүрүм тәшкилати хитайниң уйғур елидики өлүм җазалириға аит санлиқ мәлуматларни ашкарилимиғанлиқини билдүрди

Мухбиримиз ирадә
2018-04-12
Елхәт
Пикир
Share
Принт

Хәлқара кәчүрүм тәшкилати уйғур елида иҗра қилиниватқан өлүм җазалириға аит санлиқ мәлуматларниң ашкариланмаслиқи күчлүк әндишә пәйда қилмақта, деди.

Хәлқара кәчүрүм тәшкилати бу сөзни 12-апрел пәйшәнбә күни елан қилған дуня миқясидики өлүм җазалири һәққидә чиқарған йиллиқ доклатида қилған. Хитай бу йиллиқ доклаттиму илгирики йилларға охшашла дунядики өлүм җазаси әң көп иҗра қилинидиған дөләт болуп баһаланған.

Доклатниң хитайға аит қисмида көрситилишичә, хитайда иҗра қилиниватқан өлүм җазалири «дөләт мәхпийәтлики» дәп қаралғанлиқтин хитай даирилири әмәлий рәқәмни йошуруп кәлгән. Әмма хитай сот тармақлириниң тор бәтлиригә қоюлған бәзи архиплар вә ахбарат хәвәрлири хитайда 2017-йили ичидә йәнә миңлиған кишиләргә өлүм җазаси берилгәнлики вә иҗра қилинғанлиқини көрсәтмәктикән.

Бирақ, хәлқара кәчүрүм тәшкилати өзиниң доклатида уйғур елидики өлүм җазаси мәсилисиниң өзлиридә күчлүк әндишә пәйда қилғанлиқини әскәрткән. Уларниң қаришичә, уйғур елида өткән бир йил ичидә бихәтәрлик тәдбирлири һәссиләп күчәйтилгән һәм шундақла «қаттиқ зәрбә бериш», «террорлуққа қарши хәлқ туруши» қатарлиқ һәрикәтләр күчлүк йосунда давам қилған туруқлуқ өлүм җазаси берилгәнләргә аит һечқандақ бир хәвәр яки рәқәм елан қилинмиған. Хитай алий сотиниң тор бетидә өлүм җазаси берилгән пәқәт бирла делониң хатириси тепилған.

Хәлқара кәчүрүм тәшкилати доклатида йәнә хитайниң уйғур елида өлүм җазалирини кәңри йолға қоюп кәлгәнликини нәзәрдә тутқанда 2017-йилиға аит һечқандақ бир санлиқ мәлумат тепилмаслиқи уларниң диққитини қозғиған. Доклатта хәлқарадики көзәткүчиләрниң уйғур елида иҗра қилиниватқан өлүм җазалирини қануний тәртипләргә уйғун болмаслиқ, адил болмаслиқ билән әйибләйдиғанлиқиму әскәртилгән.

Хәлқара кәчүрүм тәшкилати доклат арқилиқ хитай һөкүмитини өлүм җазалириға аит мәлуматларни аммиға ечиветишкә вә қануний тәртипләрниң очуқ-ашкарилиқиға капаләтлик қилишқа чақирған.

Пикирләр (0)
Share
Толуқ бәт