Prézidént baydén putinning ukra'ina urushida “Meghlup bolghanliqi” ni bildürgen

Bu heptining bashlirida shimaliy atlantik ehdi teshkilatining bashliqlar yighinigha qatnashqan we arqidin litwa bilen finlandiyede ziyarette bolghan amérika prézidénti jow baydén, rusiye prézidénti putinning ukra'ina urushida ghelibe qilish “Mumkinchiliki yoq” ikenlikini, uning urushta “Meghlup bolghanliqi” ni bildürgen. Washin'gtondiki “Töpilik” gézitining xewer qilishiche, prézidént baydén bu sözni 13-iyul finlandiye prézidénti sa'uli ninistö bilen ötküzgen muxbirlar kütüwélish yighinida, ukra'inaning NATO eza bolushi heqqide bergen wedisi putinning urushni téximu uzun dawamlashturushini keltürüp chiqirish-chiqarmasliqigha da'ir bir so'algha qarita éytqan.

Baydénning éytishiche, héchqandaq bir dölet urush halitide turghanda NATO gha qobul qilinmaydiken. U buning pütkül ittipaqni urushqa sörep kiridighanliqini éytqan. Prézidént baydén mundaq dégen: “Bu putinni dawamliq urushtin saqlap qalamdu-yoq dégen mesilige kelsek, buning jawabi shuki, putin urushta meghlup bolup boldi”. Baydén yene mundaq dégen: “Emma axirida qandaq kélishimning hasil qilinishi, putin we uning néme qilishni qarar qilishigha baghliq. Lékin uning ukra'inadiki urushta ghelibe qilish mumkinchiliki yoq. U alliburun bu urushta meghlup bolup boldi”.

Prézidént baydén bu heptining bashliri litwa paytexti wélni'usta ötküzülgen NATO eza döletler bashliqliqliri yighinigha qatnashqan. Yighinda xitayning dunya bixeterlikige élip kéliwatqan tehditi nuqtiliq muzakire qilin'ghan mesililerning biri bolghan. NATO Gha eza döletlerning 2 künlük yighini esnasida élan qilghan ortaq xitabnamide, küchlük söz-ibariler bilen xitay xelq jumhuriyitining “Melum bolghan xirisi we zorlash xaraktérlik siyasiti” ning ittipaqning menpe'eti, bixeterliki we uning qimmet qarishigha xiris peyda qiliwatqanliqi tekitlen'gen. Ortaq xitabnamide yene xitay bilen rusiyening “Istiratégiyelik shérikchilik munasiwitini yenimu chongqurlashturup, qa'ide-qanunlar asasidiki xelq'ara tertipke buzghunchiliq qiliwatqanliqi” bildürülgen.