Amérikaning yardemchi tashqiy ishlar ministiri mariye roys qazaqistanda Uyghur we qazaq lagér shahitlirini qobul qilghan

Amérikaning yardemchi tashqiy ishlar ministiri mariye roys ötken heptining axirliri qazaqistanni ziyaret qilip, Uyghur, qazaq lagér shahitlirini, tutulghan we ghayip bolghan tutqunlarning a'ile-tawabi'atlirini qobul qilghan. Amérikaning qazaqistanda turushluq elchixanisining 27-noyabir xewer qilishiche, mariye roys shahitlar we a'ile ezalirining baturluq bilen ochuq-ashkara sözligenlikige rehmet éytqan. U bularning xitay xelq jumhuriyitining az sanliq milletlerni xorlash siyasitining heqiqi qiyapitini échip bergenliki, shuning bilen bir waqitta yene buning xitay xelq jumhuriyitining bu xil xorlash siyasitini toxtitishi üchün xelqara bésim shekillendürüshke yardem béridighanliqini tekitligen.

U shahitlar we a'ile ezalirigha mundaq digen: “Biz siler terepte turup, xitay hökümitini xorlashni derhal toxtitishqa, ularni shinjangdiki türkiy xelqlerning din'gha étiqad qilishi we öz medeniyitini qedirlesh hoquqigha hörmet qilishqa chaqirimiz. Men silerning kechmishinglarni anglap shereplendim. Men uni özüm bilen élip yürüp, téximu köp kishilerning shinjangda yüz bériwatqan ishlarning heqiqiy mahiyitini chüshinishi üchün ortaqlishimen.”

Qazaqistandiki amérika elchixanisining xewiride xitay kompartiyesining shinjangdiki Uyghurlarni asas qilghan qazaq we bashqa az sanliq milletlerning kishilik hoquqini éghir depsende qiliwatqanliqi, buning “Mejburiy nupus kontrol qilish, mejburiy emgek, lagérlargha xalighanche qamash, keng kölemlik nazaret qilish, a'ililerni ayriwétish, diniy we medeniyet ipadilirini basturush qatarliq usullarni öz ichige alidighanliqi” tekitlen'gen. Bu yuqiri derijilik amérika emeldarining qazaqistan ziyaritide 2-qétim lagér shahitlirini we tutqunlarning a'ile tawabi'atlirini qobul qilishidur. Amérika tashqiy ishlar ministiri pompéyo bu yil 2-ayda qazaqistanni ziyaret qilghandimu ularni qobul qilghan idi.