Qazaqistan 19 xitay ishchini chégradin qoghlap chiqardi

Qazaqistan hökümiti yéqinda 19 neper xitay ishchini qazaqistan köchmenler qanunigha xilapliq qilish seweblik chégradin qoghlap chiqarghan.

Qazaqistan axbarat agéntliqining xewer qilishiche, bu 19 xitay ishchi tutqun qilinishtin burun gherbiy jenubi qazaqistanning man'ghistay oblastining néfitlik rayonidiki bir shexsi karxanida ishleydiken.

Qazaqistan axbarati, xitay ishchilirining konkrét qachan tutqun qilin'ghanliqini tilgha almighan bolsimu, emma 3‏-noyabir qazaqistan köchmenler da'irilirining sözini neqil keltürüp bergen xewiride, xitay ishchilarning dölitige qayturulghanliqini bildürgen.

Xewerde qeyt qilishiche, xitay ishchilar qazaqistanning chet'ellik ishlemchiler qanunigha xilapliq qilip, héchqandaq qanunluq ishlesh salahiyiti yoq turup ishligen. Mezkur weqe qazaqistanda nechche yüz ming xitay köchmenning qazaqistan'gha kélip olturaqlashqanliqigha da'ir xewer tarqilip, qazaqistan puqralirida qattiq endishe qozghighan peytte yüz berdi.

Jem'iyettiki bu ensizlikke qarita, qazaqistanning xitayda turushluq elchixanisi 1‏-noyabir astanada axbarat yighini chaqirip, qazaqistan xelqige chüshenche bérishke mejbur bolghan. Qazaqistan bash elchisi shaxrat nurishéfning bildürüshiche, qazaqistan 2015‏-yili xitay puqralirigha 118321 wiza bergen, emma bu wizilarning 70% din köpreki xitaydiki qazaqlargha bérilgen. U, xitay puqralirigha 2016‏-yili öktebirge qeder 86203 wiza bérilgenlikini, emma bu wizilarning 68% ni yene qazaqlar alghanliqini bildürgen.