Yawropa birliki komissarining xitaylarni “Qiysiq köz” déyishi ghulghula qozghidi

Yawropa birlikining xamchot komissiyonining bashliqliqigha yéngidin teyinlen'gen gérman siyasetchi gantir otin'ger ötken hepte bir yighinda xitaylarni qiysiq köz dep mesxire qilghan.

U yene sözide, yawropa birlikini ziyaret qilishqa kelgen xitay ministirlar guruppisi heqqide toxtalghanda “Ular chéchini soldin onggha tariwalghan we ayaq méyida mayliwalghan” dep chaqchaq qilghan. Yoshurunche sin'gha élin'ghan we yotupta ashkarilan'ghan bu sözler, nöwette xelq'ara axbarat wasitiliride ghulghula qozghimaqta.

Xitay tashqi ishlar bayanatchisi xu'a chünying bügün mezkur sözlerge inkas qayturup “Bu, bezi yawropa siyasetchilirining yoghanchi xaraktérini körsitip béridu, ular özigimu, bashqilarghimu obyéktip qarashni we barawer mu'amile qilishni öginishi kérek” dégen. Firansiye axbarat agéntliqining bügünki bu heqtiki xewiride déyilishiche, otin'gér axbaratqa bergen bu heqtiki izahatida özining yuqiriqi sözlerni tüzla dégenlikini, xitaylarni kemsitish meniside démigenlikini éytqan.

Xelq'ara xewerlerde yézilishiche, ottin'ger yuqiriqi sözlirini yawropa birlikining hamburgda échilghan bir yighinida éghizdin chiqarghan. Melum bolushiche, ottin'ger yighinda xitay shirketlirining yawropada shirketlerni sétiwéliwatqanliqi, emma xitayda yawropa shirketlirining erkin pa'aliyet élip baralmaywatqanliqi we ikki terep arisida oxshash derijide yol qoyush bolushi kérekliki heqqide nuqtiliq toxtalghan. Melum bolushiche, u söz arisida xitaylarni “Qiysiq közler” we “Yalghanchilar” dep atighan.