Хитайниң уйғур елидә қозғиған "қизиллаштуруш" һәрикити шинҗаң университетиға кеңәйгән

Мухбиримиз әркин
2021-05-11
Share

Хитайниң уйғур елидә қозғиған "қизил вәтәнпәрвәрлик тәрбийәси" һәрикити уйғур илидики әң чоң билим юрти болған "шинҗаң университети" ға кеңәйгән. Хитай таратқулириниң билдүрүшичә, нөвәттә шинҗаң университетида "тарих музейи" қурулуп, бу орун хитайниң райондики әң муһим "қизил вәтәнпәрвәрлик тәрбийәси" мәркәзлириниң биригә айланған.

Бу музей шинҗаң университетиниң 1952-йили селинған аталмиш "азадлиқ" бинасиниң асасиға қурулған болуп, "интайин муһим тарихий материяллар" қоюлған бу музей "қайнап турған қизил мәдәнийәт муһитиға игә" икән.

Лекин көзәткүчиләрниң қаришичә, бу музей вә униңдики "қизил вәтәнпәрвәрлик тәрбийәси" гә аит материял вә буюмлар хитай һөкүмитиниң 2017-йили чоң тутқун билән тәң башлиған, уйғур тарихи вә мәдәнийити инкар қилип, униң орниға омуми йүзлүк хитай тарихий вә мәдәнийитини дәсситиш, уйғурларниң тарихий излирини үзүл-кесил өчүрүп ташлаш пиланиға хизмәт қилидикән.

Хитай һөкүмити чоң тутқунда уйғурларниң райондики әң бурун қурулған шундақла уйғур миллий маарипиниң барлиққа келиши, раваҗлиниши, заманиви илим-пән вә әдәбий тили шәкиллиниши һәм пән тәтқиқатиниң барлиққа келишидә ул әслиһәлик ролини ойниған бу мәктәпниң уйғур профессорлирини, мәсуллирини тутқун қилғаниди.

"тәңри тағ" ториниң хәвәр қилишичә, тарих музейи алтә көргәзмә залиға бөлүнгән болуп, булар "алтун йиллар", "қизил мирас", "орунни чиң тутуш" дегән темиларға бөлүнгән шундақла мәхсус бир "мунәввәр әнәниви хитай мәдәнийәт көргәзмиси" бар икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт