Һәммә җайиға 400 милйон камера орнатқан хитай дунядики әң чоң сақчи дөлитигә айланған

Америкадики CBSN ториниң 4-дикабир күни елан қилған мақалисигә қариғанда, хитай һазир “пуқраларни омумйүзлүк көзитиш вә контрол қилиш” дәвригә киргән болуп, мәмликәтниң һәммә җайиға 400 милйон камера орнитип, дунядики әң чоң тәқип-назарәт дөлитигә айланған.

Мақалидә ейтилишичә, америкадики “ахбарат һәммидин муһим” намлиқ программида “тәқип назарәт дөлити: җәмийәтни контрол қилишниң йеңи дәврини башлимақчи болған хитайниң урунушлири” намлиқ йеңи китаб һәққидә сөһбәт елип берилған. Китаб апторлиридин “вол-стрет журнили” мухбири лиза лин (Liza Lin) билән җош чин (Josh Chin) хитай һөкүмити топлиған санлиқ мәлуматларниң башқа һәр қандақ дөләттин ешип кәткәнликини, америка киримни җилғисидин кәлгән илғар техникиларниң бу ишқа қандақ ярдәм бәргәнликини, уйғур районидики хәлқни контрол қилиш үчүн хитайниң у техникилардин қандақ пайдиланғанлиқини ейтқан.

Улар йәнә хитайдики камераларниң 400 милйондин ашидиғанлиқини, хитай һөкүмитиниң хитайдики бир милярд абонтниң әқлифониға бималал кирип тәкшүрүп, хитайниң хәвпсизликигә четилидиған һәр қандақ учурни сүзүп алалайдиғанлиқини билдүргән.

Сөһбәттин мәлум болушичә, уйғур райони хитайниң әң дәсләпки тәқип-назарәт системиси қурған вә синақ қилған базиси болуп, униңдин кейин хитай һөкүмити бу системини ичкири хитайға, һәтта асия, африқадики башқа дөләтләргиму кеңәйткән.