Сәуди әрәбистан хитайниң уйғурларни бастуруш сияситини қоллиғанлиқини ақлиди

Мухбиримиз әркин
2019-07-19
Елхәт
Пикир
Share
Принт

Сәуди әрәбистан 19‏-июл күни өткән һәптә русийә, пакистан, әрәб әллири вә бәзи африқа әллирини өз ичигә алған дунядики 36 дөләт қатарида бир мәктупқа имза қоюп, хитайниң 2 милйондәк уйғур вә башқа мусулманларни йиғивелиш лагерлириға қамаштәк уйғур районидики сияситини қоллиғанлиқини ақлиди.

Ройтерс агентлиқиниң хәвәр қилишичә, сәуди әрәбистанниң б д т турушлуқ даимий вәкили абдулла әл муалими 19‏-июл ню-йорк шәһиридә мухбирларға қилған сөзидә: «мәктупта пәқәт хитайниң иқтисадий тәрәққияти тилға елинған. Униңда тилға елинған мәсилә бу, башқа мәсилә әмәс» дегән. Өткән дүшәнбә күни японийәни өз ичигә алған ғәрбтики 22 дөләтниң б д т кишилик һоқуқ кеңишидә турушлуқ әлчилири бирләшмә имзалиқ мәктуп елан қилип, хитайниң уйғур районидики йиғивелиш лагерлирини дәрһал тақашни, тутқунларни қоюп беришни тәләп қилған. Арқидинла русийә, мисир, сәуди әрәбистан, пакистан, парис қолтуқидики әлләр вә африқадики бәзи дөләтләр бир мәктупқа имза қоюп, хитайниң «шинҗаң сиясити» ни қоллайдиғанлиқини билдүргәниди.

Ройтерсниң хәвиридә қәйт қилинишичә, абдулла әл муалими мәктупқа имза қойғанлиқини ақлап: «һечким дунядики һәрқандақ йеридики мусулманларниң әһвалиға сәуди әрәбистандәк көңүл бөлмәйду. Биз бу мәктупта инсанларни намратлиқтин қутулдуридиған тәрәққият сияситини қоллайдиғанлиқимизни ипадилидуқ» дегән. Сәуди әрәбистанниң бу мәктупта хитайни қоллап имза қоюши хәлқара зор ғулғула қозғап, кишилик һоқуқ тәшкилатлириниң қаттиқ тәнқидигә учриған. Кишилик һоқуқ көзитиш тәшкилатиниң б д т ишлириға мәсул директори луис чарбоне абдулла әл муалиминиң сөзни тәнқидләп: «бу мәктуп хитайниң бастурушиға учраватқан мусулманларниң йүзигә урулған бир шапилақ. Мәнтиқисизлиқтики еғир хаталиқ» дегән. Мәктупқа хитайни қоллап имза қойған 37 дөләтниң һәммиси истибдат дөләтләр болуп, мәктупта «шинҗаңда террорлуқ вә радикаллиққа қарши турушта җиддий зорлуқларға дуч кәлгән хитай, бир қатар террорлуқ вә радикаллиқни түгитиш тәдбирлирини алди» дейилгәниди.

Пикирләр (0)
Share
Толуқ бәт