Хитайниң “шинҗаң хизмити йиғини” дики мәқсәдлири ашкара тилға елинишқа башлиди

Мухбиримиз әзиз
2021.10.06

Уйғур дияридики омумий сиясий вәзийәтни бекиткүчи баш “режиссор” ниң кимлики айдиңлишиватқанда, хитай һөкүмитиниң бу хил вәзийәтни рояпқа чиқиришидики барлиқ йетәкчи идийәләрниң әмәлийәттә үч қетимлиқ “шинҗаң хизмити сөһбәт йиғини” җәрянида тәпсилий муһакимә қилинип бекитилгәнликиму мәлум болушқа башлиди.

Хитай һөкүмити башқуришидики “тәңритағ” тори 6-өктәбиргә қәдәр “‛үчинчи нөвәтлик шинҗаң хизмити сөһбәт йиғини‚ һәққидики баянлар” мавзусида бир йүрүш чатма хәвәрләрни елан қилған болуп, буларниң мәркизий идийәси сүпитидә “шинҗаң хизмитини яхши ишләшниң ачқучи партийәдә. Үчинчи нөвәтлик шинҗаң хизмити йиғинида баш секретар ши җинпиң ‛партийәниң шинҗаң хизмитигә болған рәһбәрликини күчәйтиштә чиң туруш‚ ни алаһидә тәкитлигән” дейилгән. Хәвәрдә бу хилдики “партийә һәммигә мутләқ игидарчилиқ қилиш” ниң уйғур дияридики иҗтимаий муқимлиқ вә узун мәзгиллик әминликниң баш қиблинамиси икәнлики, партийә қурулуши вә партийиви кадирлар қошуни арқилиқ муқимлиқни қоғдаш, бөлгүнчиликкә қарши турушниң “мустәһкәм қәләлири” ни бәрпа қилиш алаһидә тилға елинған.

Хәвәрдә алаһидә йәр алған бир нуқта нөвәттә уйғур дияридики әң мукәммәл етиқад системиси тоғрилиқ тохтилип: “компартийәниң мәниви түврүки вә сясий роһини баш етиқад қилғанда, барчә ишта утуқ қазиналаймиз” дәп хуласә чиқирилған. Шуниңдәк компартийә байриқини “һәр бир комунист бир байрақ, һәр бир кәнт бир мустәһкәм база” болған “истиһкам” ларда ләпилдитиш чақириқи оттуриға қоюлған.

Америкадики мустәқил анализчи илшат һәсән бу һәқтә тохтилип, буниң әмәлийәттә хитай һөкүмитиниң уйғур дияридики бир қетимлиқ “етиқад йәңгүшләш урунуши” икәнликини билдүрди. Шундақла буниң нөвәттики ирқий қирғинчилиқниң нәзәрийиви асасиниң бир қисми икәнликини тәкитләп: “хитай компартийәси мушу арқилиқ комунизим етиқадини шәрқий түркистандики йетәкчи етиқад айландурмақчи болуватиду. Буниң маһийәттә бундин кейинки вәзийәтниң мушу йолйоруқ асасида техиму чоң зулмәткә қарап маңидиғанлиқиниң бишарити,” деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.