Уйғур аптоном районлуқ сиясий - қанун системиси мәмурлуқ хизмити үчүн җиддий түрдә оқуғучи қобул қилмақтикән

Уйғур аптоном районлуқ сиясий - қанун системиси йеқинда уқтуруш чиқирип, мәмурлуқ хизмити үчүн җиддий түрдә җәмийәттин оқуғучи қобул қилидиғанлиқини елан қилған.

Хәлқ ториниң бу һәқтики хәвиригә қариғанда, бу қетим қобул қилинидиған 121 нәпәр оқуғучи оқуш пүттүргәндин кейин наһийә дәриҗиликтин төвән сиясий - қанун органлириға берип хизмәт қилидикән.

Игилинишичә, нөвәттә сиясий - қанун кадир - сақчилирини тәрбийәләш бойичә уйғур аптоном районидин оқуғучи қобул қилиш хизмити җиддий түрдә елип берилмақтикән. 22 - Авғусттин буян тизимлитиш рәсмийәтлирини беҗиргән яшлар сиясий - қанун орунлириниң қатму - қат тәкшүриши, болупму сиясий арқа көриниши билән компартийәгә болған садақити тәкшүрүлүп, бу өткәлдин өткәнләр сентәбирниң ахиридики рәсмий имтиһанға қатнаштурулидикән.

Йеқинқи йиллардаин буян уйғур аптоном районлуқ даириләр райондики һәр дәриҗилик сиясий - қанун органлириниң адәм күчини зор көләмдә ашурғанлиқи мәлум. Әһвалдин хәвәрдар кишиләрниң радийомизға билдүришичә, уйғур тили кәспи бойичә баклаверлиқ яки магестерлиқ оқушини тамамлиған зор сандики хитай оқуғучилар нуқтилиқ һалда наһийә дәриҗиликтин төвән сиясий - қанун органлириға тәқсим қилинмақтикән.

Көзәткүчиләр, буниң уйғур елидики күнсайин кәскинлишиватқан милләтләр мунасивити вә даириләрниң муқимлиққа болған җиддий еһтияҗи билән мунасивәтлик икәнликини илгири сүрмәктә.