Тайланд сақчи даирилири баңкоктики партлашқа четишлиқ җинайәт гумандариниң тайландқа қанунсиз йоллар арқилиқ киргәнликини ейтқан

Мухбиримиз ирадә
2015.09.10
Share on WhatsApp
Share on WhatsApp

Тайланд даирилири бүгүн баңкоктики партлашқа четишлиқ, дәп елан қилған җинайәт гумандарлиридин бири болған “абдурахман абдусаттар” исимлик кишиниң хитай паспорти барлиқини, униң вәқәдин бир күн бурун тайландтин айрилип, бенгал арқилиқ хитайға қайтип кәткәнликини җакарлиди.

Тайланд сақчи даирилири йәнә қолға елинған икки кишидин бири болған “адәм карадаг” ниң тайландқа қанунсиз йоллар арқилиқ киргәнликини билдүргән. Тайланд даирилири адәм карадаг исимлик бу гумандарниң алди билән вийетнам арқилиқ тайландқа қошна болған мәлум дөләткә йетип кәлгәнликини, андин чеграда 600 доллар пара бериш арқилиқ қанунсиз һалда тайландқа киргәнликини билдүргән, бирақ улар бу қошна дөләтниң исмини ашкарилимиған.

Тайланд даирилири адәм карадаг исимлик бу гумандарниң қолида түрк паспорти барлиқини билдүргән. У баңкоктики партлашқа четилип қолға елинған тунҗи киши иди. Қолға елинғанларниң йәнә бири, йүсүф мирәли. Тайланд даирилири алдинқи күни йүсүф мирәлиниң хитай паспорти барлиқини вә униңда кәлгән йериниң “шинҗаң” дәп йезилғанлиқини елан қилған.

Фирансийә агентлиқиниң ейтишичә, тайланд сақчи даирилири пәйшәнбә күни бу икки кишиниң паспортлириниң раст-ялғанлиқини ениқлаш үчүн паспорт копийилиирини түркийә вә хитайниң алақидар орунлириға әвәтип бәргән. Хитай ташқи ишлар министирлиқиниң баянатчиси хуң лей бүгүнки баянатида, тайланд даирилири билән бу дело үстидә йеқиндин һәмкарлишиватқанлиқини, җинайәтчиләрниң қаттиқ җазалинидиғанлиқини ейтқан.

Чәтәлләрдики уйғур көзәткүчиләр тайландтики бу дело һәққидә елан қилиниватқан учурларда гуманлиқ нуқтиларниң көплүкини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.