Yawropa parlaménti teywen'ge wekiller ömiki ewetip, teywenning yalghuz emeslikini tekitligen

Yawropa parlaméntining tunji resmiy wekiller ömiki teywende ziyarette bolup, teywenning yalghuz emeslikini tekitligen.

Roytérs agéntliqining xewiridin melum bolushiche, yawropa parlaméntining 13 neper ezasidin terkib tapqan bir hey'et teywende 3 künlük resmiy ziyarette bolghan. Ular ziyaritining ikkinchi küni, yeni 4-noyabir peyshenbe küni teywen prézidénti sey yingwén bilen körüshken.

Yawropa parlaméntining teywen'ge barghan mexsus wekiller ömikige yawropa parlaméntning fransuz ezasi rafa'il gluksman bashlamchiliq qilghan bolup, u teywen prézidénti sey yingwén bilen ötküzülgen uchrishishta mundaq dégen: “Bizning bu yerge kélishimizdiki seweb intayin addiy we nahayiti ochuq: u bolsimu siler yalghuz emes, yawropa siler bilen bille.”

U yene mundaq dégen: “Ziyaritimizni intayin muhim birinchi qedem dep qarash kérek. Emma kéyinki qedemde biz téximu küchlük yawropa ittipaqi-teywen shériklik munasiwiti ornitish üchün yuqiri qatlamliq uchrishish we yuqiri qatlamliq konkrét qedemlerni öz ichige alghan konkrét körsetme tüzüp chiqishimiz lazim.”

Teywen prézidénti sey yingwén bolsa ularni qarshi élip, yawropa ittipaqi-teywen ikki terepning hersahediki hemkarliqini chongqurlashturushi lazimliqini bildürgen.

Xitay hökümiti yéqindin buyan teywen'ge tehdit sélish xaraktérliq herbiy heriketlirini zor derijide kücheytiwatqan idi. Shundaq bir mezgilde yawropa parlaménti resmiy wekiller ömikining teywenni ziyaret qilishi küchlük diqqet qozghaydiken. Teywenning yawropa ittipaqida watikandin bashqa héchqandaq dölet bilen déplomatik munasiwiti yoq.

Xitay tashqiy ishlar ministérliqining bayanatchisi wang wénbin bolsa mezkur ziyaretni qattiq eyibligen. U 3-noyabir künidiki muxbirlarni kütüwélish yighinida: “Biz yawropa ittipaqining xataliqini tüzitip, teywen bölgünchi küchlirige xata signal bermeslikini telep qilimiz. Undaq bolmighanda, bu xitay-yawropa ittipaqi munasiwitige ziyan yetküzidu,” dégen.