Tibetlik yazghuchi wo'isér chet'el muxbirlirining tibet ziyaritige hemkarlashqan dégen bahanida öyige nezerbent qilindi

Tibetlik ayal yazghuchi wo'isérning gérmaniye agéntliqigha bildürüshiche, da'iriler uni we éri wang lishiyung ependini,“Xitayda turushluq chet'el muxbirlirining tibet ziyaritige hemkarlashqan” dégen bahanida,19 - iyundin bashlap béyjingdiki öyige nezerbent qilghan.

Gérmarniye agéntliqining bügünki xewiride diyilishiche, 19 - iyun küni ikki neper saqchi ularni sheherning gherbi rayonidiki pa'aliyetke qatnishiwatqan jaydin sheherning sherqi rayonidiki öyige élip kelgen we ularning ishigi aldida turup ularni nazaret qilghan. Saqchilar yene bu ikkeylenning sirtqa chiqishigha ruxset qilinmaydighanliqini uqturghan.

Melum bolishiche,bu heptining béshida,wo'isér béyjingdiki ikki neper chet'el muxbiri we bir neper chetel déplomatiye xadimi bilen körüshken. Ular xitay tashqi ishlar ministirliqi teshkilligen chet'el muxbirlar ömigining ezaliri bolup,yéqin arida tibetni ziyaret qilishqa teyyarliniwatqan iken.

2008 - Yili tibette yüz bergen 11 - mart tibet weqesi we 2009 - yili ürümchide yüz bergen 5 - iyul weqesidin kéyin,xitay da'iriliri tibet we Uyghur élige ziyaretke kélidighan chetel muxbirlirigha qaratqan nazaret we cheklimini kücheytken.Bu jaylargha kelgen chet'el muxbirlirining ziyaritini qobul qilghan Uyghurlar we tibetler qattiq tekshürülüsh hetta qolgha élinip sotlinish qismetlirige yoluqmaqta.