Президент трамп пакистанни “сахтипәзлик” билән әйиблиди

Америка президенти доналд трамп алдинқи күни твиттерда елан қилған тунҗи йеңи йиллиқ баянатида, пакистанни “ялғанчилиқ”, “сахтипәзлик” билән әйиблигән. У, пакистан америкиниң нәччә милярд доллар ярдимигә еришип кәлгән болсиму, әмма униң террорлуққа янтаяқ болғанлиқини илгири сүргән.

Б б с ниң билдүрүшичә, президент трампниң йеңи йиллиқ тунҗи твиттер учурида пакистанни әйиплиши диққәт қозғиған. Президент трамп баянатида: “америка өткән 15 йилда пакистанға һамақәтләрчә 33 милярд доллар ярдәм бәрди. Лекин у бизгә ялғанчилиқ, сахтипәзликтин башқа һечнемә қилип бәрмиди. Улар бизниң рәһбәрлиримизни әхмәқ қилди,” дегән. Президент трамп йәнә пакистанниң террорлуққа янтаяқ болуватқанлиқи, униң террорчиларни макан билән тәминләватқанлиқи, бу җәһәттә униң қолға чиққудәк һечқандақ ярдәм қилмиғанлиқини тәкитлигән.

Лекин пакистан ташқи ишлар министири каваҗа асеф президент трампниң сөзигә пат арида җаваб қайтуридиғанлиқини билдүргән. У твиттерда елан қилған баянатида “биз президент трампниң твиттердики сөзигә иншаалла, пат арида инкас қайтуруп, дуняға һәқиқәтни, пакит билән фантазийә оттурисидики пәрқни ашкарилаймиз” дәп көрсәткән. Лекин бу президент трампниң пакистанни тунҗи қетим террорчиларға янтаяқ болуш билән әйиплиши әмәскән. У 2017‏-йили 8‏-айда қилған бир қетимлиқ сөзидә “биз пакистанға милярдлап доллар ярдәм қиливатимиз, бирақ у биз уруш қиливатқан террорчиларни макан билән тәминләватиду,” дегән.

Пакистан өзиниң террорлуққа қарши зор бәдәл төләватқанлиқини, хитай билән “шәрқий түркистан ислам һәрикити” гә қарши һәмкарлишиватқанлиқини илгири сүрсиму, бирақ у “җаиши‏ муһәммәт” вә шуниңға охшаш пакистанни база қилған бәзи радикал тәшкилатларни қанат астиға елип елип кәлди. Пакистан 2017‏-йили хитайниң ярдимидә 2 қетим “җаиши муһәммәт” тәшкилатиниң рәһбири мәсуд әзһәрниң б д т ниң террорчилар тизимликигә киргүзүлүшини тосуп қалған иди.