Türkiyediki xelq'ara adwokatlar birliki abduqadir yapchanni qoyup bérish heqqide bayanat élan qildi

Türkiyediki xelq'ara adwokatlar birliki nöwette istanbulning maltepe qamaqxanisida tutup turuliwatqan Uyghur jama'et erbabi abduqadir yapchanning qoyup bérilishi üchün mexsus bayanat élan qilghan. Dunya bülteni qatarliq türk metbu'atlirida keng xewer qilin'ghan bu bayanatta, abduqadir yapchanning pa'aliyetlirining térrorluq bilen héchqandaq alaqisi yoqluqi otturigha qoyulghan.

Yapchanning 15 yildin béri türkiyede yashawatqanliqi, 14 yil burun xitay teripidin tutush buyruqi chiqirilghanliqi, bu buyruqning endilikte xitay teripidin qayta küntertipke kelgenliki tilgha élin'ghan bayanatta, abduqadir yapchanning derhal qoyup bérilishi telep qilin'ghan.

Abduqadir yapchan 30 - awghust küni istanbul saqchi da'iriliri teripidin tutulup, 30 kündin kéyin qoyuwétilgen, etsi yene qayta tutqun qilinip 40 künlük nazaret astigha élin'ghan idi.

Organ tor bétidin melum bolushiche, xelq'ara adwokatlar birliki dunya miqyasida adalet we tinchliqning berpasi üchün xizmet qiliwatqan, merkizi istanbulgha jaylashqan bir xelq'araliq insan heqliri teshkilatidur. Mezkur teshkilatning nöwette süriye, makédoniye we sudan qatarliq 4 dölette wakaletchiliri barliqi melum.