Türkiyede “Sherqiy türkistan musulmanliri” namliq zhurnal neshrdin chiqti

“Türkiye awazi” radiyosining xewirige qarighanda, türkiyede tesis qilin'ghan Uyghur tilidiki “Sherqiy türkistan musulmanliri” zhurnilining tunji (sinaq) sani yéqinda neshr qilinip, oqurmenler bilen yüz körüshken.

Igilinishiche, mezkur zhurnal istanbuldiki “Teklimakan Uyghur neshriyati” teripidin neshr qilin'ghan bolup, u yérim yilda bir san yoruq köridighan ilmiy, siyasiy, tarixiy we edebiy xaraktérlik uniwérsal zhurnal iken.

“Sherqiy türkistan musulmanliri” zhurnilining tunji sinaq sanida bash muherrir abdujélil turanning “Muherrirdin” namliq bash maqalisi, mirkamil kashigherining “Ellame muhemmed iqbalning sherqiy türkistan'gha bolghan qarishi we pakistan siyasetchilirining xiyaniti” namliq maqalisi, “Iman we muhebbetke tolghan bir hékaye” namliq romanning birinchi bölümi, merhum kommunar talipofning “Muhemmet'imin bughraning hayati we pa'aliyiti heqqide” namliq maqalisi shundaqla emin wahidining “Esletme” namliq tarixiy xatirisi qatarliq maqale,eserler orun alghan.

Zhurnalning sahibi we bash muherriri abdujélil turan ependi “Sherqiy türkistan musulmanliri” zhurnilini muhajirettiki Uyghur oqurmenlerning Uyghur tilidiki neshr-ebkarlargha bolghan jiddiy telipi shundaqla chet'ellerdiki Uyghur yazarliri bilen bilim ademlirige öz eserlirini élan qilidighan bir sehne hazirlash éhtiyajidin neshr qilghanliqini bildürgen.