Uyghur diyari xitayning yéngi ashliq bazisi boluwatamdu?

Washin'gtondin muxbirimiz eziz teyyarlidi
2024.05.29

Xitay bashqurushidiki “Xitay xewerliri tori” ning 28-maydiki xewiride éytilishiche, qeshqer wilayiti “Ichki qisimda qalduruq saqlash, döletni teminlesh” pirinsipi boyiche “Döletning we aptonom rayonning yazliq ashliq sétiwélish siyasitini qet'iy ijra qilish” ni bashlighan, shuningdek 2024-yilliq yazliq ashliq yighimining deslepki teyyarliqini tamamlighan.

Xewerde éytilishiche, bu “Bash wezipini toluq ijra qilish” üchün yeken, konasheher qatarliq nahiyelerdimu tégishlik xizmetler jiddiy qanat yaydurulghan bolup, ambarlarning kölimini kéngeytish, ashliq saqlash süpitini östürüsh, ashliq sétiwélishni asanlashturush  qatarliq charilar élin'ghan. Yeken nahiyelik ashliq sétiwélish cheklik hessidarliq shirkitining mu'awin diréktori esqer tursun bu heqte söz qilip, “Bu yil 110 ming tonna ashliq sétiwalmaqchi boluwatimiz.  Hazir buning ambarlirini teyyarlap bolduq” dégen.

Qeshqer wilayiti tewesidiki ashliq sétiwélishning bash nishani “Döletni teminlesh” bolidighanliqi xewerde alahide tekitlen'gen bolup, buningda qeshqerdiki küzgi bughday térilghan töt milyon mo (texminen 266 ming géktar) térilghu yerdin bir milyon 800 ming tonna ashliq yighiwélish mölcherlen'gen. Shuning bilen birge “Sétiwélish, sétip bérish we saqlash” halqilirining qattiq nazaret qilinip, héchqandaq mesile chiqmasliqigha képillik qilish telep qilin'ghan.

Xewerde tekitlen'gen bu hal xitay hökümiti yéqinqi yillarda Uyghur diyarida wujudqa chiqiriwatqan zor kölemlik orunlashturushlar, jümlidin Uyghur diyarida “Sekkiz chong ishlepchiqirish bazisi” berpa qilish istratégiyesi bilen zor derijide mas kélidighanliqi melum. Bolupmu xitay bilen gherb dunyasi otturisidiki munasiwet barghanséri yirikliship méngiwatqanda, xitayning yéngi bir meydan “Soghuq urush” qa teyyarliq körüsh, “Öz küchige tayinip ish körüsh” chaqiriqi köp tekitlinishke bashlighan idi. Xitay yéza igilik-yéza ministirliqining apréldiki istatistikisida körsitilishiche, xitayning ashliq importi 12 milyon tonnadin ashqan bolup, aldinqi yildikidin 30 pirsent köpeygen. Nöwette qeshqer rayonidiki ashliq yighiwélish pa'aliyiti del mushu xil éhtiyajni arqa körünüsh qilghan, dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.