Xitay bataréye shirkiti CATL Uyghur élide mal teminligüchisi barliqini ret qilghan

Xitayning dunyagha dangliq aptomobil bataréyesi ishlepchiqirish shirkiti (CATL) “Ningdé zaman” shirkiti amérika awam palatasi xitay istratégiyelik alahide riqabet komitéti re'isi jon molénarning sözige inkas bildürüp, özlirining Uyghur élide mal teminligüchisi barliqini ret qilghan. Amérika ana weten xewpsizliki ministirliqi 22-noyabir jüme küni xitayning Uyghur mejburiy emgikige chétilishi seweblik yémeklik, métallorgiye we bashqa sahelerdiki 29 shirkitini chekligen. Jon molinar 22-noyabir küni bu 30 shirketning ichidiki “Shinjang renglik métal guruhi” bilen “Shinjang jongxé hessidarliq cheklik shirkiti” din ibaret ikki karxana “Ningdé zaman” shirkitining mal teminligüchisi ikenlikini bildürgenidi.

 Roytérs agéntliqining xewer qilishiche, “Ningdé zaman” shirkiti 26-noyabir jon molénargha qayturghan inkasida, özlirining yuqiriqi ikki shirket bilen héchqandaq alaqisini yoqluqi, shuningdek “Shinjang rayonida héchqandaq mal teminligüchisi qalmighanliqini” ni éytqan.

Halbuki, “Ningdé zaman” shirkiti Uyghur élide mal teminligüchisi barliqini ret qilsimu, emma “Nyu-york waqti” géziti ötken yili 7-ayda amérika awam palatasining maliye komitéti bilen xitay istratégiyelik alahide riqabet komitéti ford shirkitining “Ningdé zaman” bilen imzalighan bataréye ishlepchiqirish hemkarliq türini tekshürüshke bashlighanliqini bildürgen. “Nyu-york waqti” ning qeyt qilishiche, ford bilen “Ningdé zaman” ötken yili 3-ayda hemkarliq türi kélishimi imzalighandin kéyin, “Ningdé zaman” özining “Shinjang jisün litéy sana'et cheklik shirkiti” diki hessidarliq péyini satqan bolsimu, emma “Ningdé zaman” ning hessidarliq péyini sétiwalghan shirkettimu péyi barliqi, “Ningdé zaman” ning bir diréktorining bu shirkette rehberlik wezipisi öteydighanliqi melum bolghan. Halbuki, “Ningdé zaman” molénargha qayturghan inkasida, özlirining amérikani öz ichige alghan barliq bazar igilikining “Qanun-qa'idilirige qattiq hörmet qilidighanliqi” ni éytqan.