Мутәхәссисләр америка ширкәтлирини “уйғур мәҗбурий әмгикини чәкләш қануни” бойичә һәрикәт қилишқа чақирди

Америка президенти җо байден 2021-йили 12-айниң 23-күни “уйғур мәҗбурий әмгикиниң алдини елиш қануни” ни рәсмий имзалиған иди. Мутәхәссисләр әмди американиң хәлқаралиқ ширкәтлирини дәрһал бу қанунға асасән һәрикәт қилишқа чақирмақта.

Американиң тиҗарәт вә қанун саһәсидики адвокатларниң тәтқиқат тор бети “jdsupra” тор бетидә бу һәқтә мәхсус хәвәр елан қилинди. Униңда мәҗбурий әмгәк арқилиқ ишләпчиқирилған таварларниң америкаға кирмәсликигә капаләтлик қилишни мәқсәт қилидиған бу қанун нәтиҗисидә америка таможна вә чегра қоғдаш идарисиниң шинҗаң уйғур аптоном райони (XUAR) да ишләпчиқирилған барлиқ таварларни мәҗбурий әмгәк билән ясалған, дәп пәрәз қилип туруп уларни тосидиғанлиқини, чәклиминиң йәнә төвәндики саһәләрниму өз ичигә алидиғанлиқини билдүргән. Булар: уйғур районида толуқ яки қисмән қезиш елип баридиған, ишләпчиқиридиған яки қураштуридиған орунлар, шинҗаң районлуқ һөкүмәт билән хизмәтчи қобул қилиш, тошуш, йөткәш, порт яки мәҗбурий әмгәккә қобул қилиш һәққидә тохтамлашқанлар, алдинқи маддилардики шәртләр астида қезивелинған, ишләпчиқирилған мәһсулатларни експорт қилидиған орунлар, тәминләш зәнҗири үчүн уйғур районлуқ һөкүмәт яки шинҗаң ишләпчиқириш қурулуш биңтуәни даирилири билән һәмкарлашқан орун вә әслиһәләр қатарлиқларни өз ичигә алидикән.

Юқиридики бу мақалида америка ширкәтлириниң дәрһал бу қанунға әстайидиллиқ билән муамилә қилип, бу йеңи қаидигә асасән һәрикәт қилиши керәклики вә шуниңға маслишидиған истратегийә бәлгиләп чиқиши керәклики әскәртилгән.