Истанбулда бир уйғур тиҗарәтчи намәлум кишиләр тәрипидин етип өлтүрүлгән

10‏-Ноябир күни түркийәниң истанбул шәһиридә бир уйғур тиҗарәтчи намәлум кишиләр тәрипидин етип өлтүрүлгән.

Түркийә таратқулириниң илгири сүрүшичә, әркин сәмәт исимлик уйғур тиҗарәтчи 10‏-ноябир кәч 8:00 әтрапида истанбулниң фатих районидики турғут өзһәл милләт кочисиға җайлашқан бир меһманханиниң чайханисида олтурғанда қораллиқ икки киши тәрипидин етип өлтүрүлгән. Түркийә “сабаһ гезити” ниң бу һәқтики хәвиридә әркин сәмәтниң хитай вә украина паспорти барлиқи, икки қораллиқ һуҗумчиниң әркин сәмәтни етип өлтүрүп, нәқ мәйдандин қечип кәткәнлики түркийә аманлиқ органлириниң бу икки қачқун гумандарниң пейигә чүшкәнлики илгири сүрүлгән.

Хәвәрдә йәнә, дәсләпки ениқлашлардин икки гумандарниң әркин сәмәтни көзитип, униң пешиға чүшкәнлики, җинайәтни пиланлиқ садир қилғанлиқи ашкариланғанлиқини илгири сүргән. Гумандарларниң әркин сәмәтни немә үчүн нишанға алғанлиқи мәлум әмәс. Түркийә таратқулириниң хәвәрлиридә баян қилинишичә, нәқ мәйдан әтрапидин тохтитип қоюлған қирғизистан консулханисиға аит бир аптомобил байқалған.

Бу дело билән аптомобилниң қандақ мунасивити барлиқи мәлум болмисиму, әмма әркин сәмәтниң аяли бүмәрйәм ғопур билән қирғизистанда “абдураз” намлиқ ширкәт қуруп, тиҗарәт билән шуғулланғанлиқи, җәнубий қирғизистанниң баткәнт районидики бир “хитай-қирғиз базири” ниң шуларға тәәллуқ икәнлики илгири сүрүлмәктә. Азадлиқ радийосиниң хәвәр қилишичә, әркин сәмәт илгири өзиниң ширкити арқилиқ қирғизистандин 646 милйон долларни чәтәл банкисидики һесабиға йөткигән икән.

Әркин сәмәт қирғизистанға четишлиқ уйғурлардин йеқинқи бир қанчә ай ичидә өлтүрүлгән 3‏-кишидур. Йеқинда қирғизистан пайтәхти бишкәк шәһиридә 2 уйғур тиҗарәтчи арқа-арқидин өлтүрүлгәниди.