Уйғур елидики “намратларни көчүрүп ронақ тапқузуш қурулуши” диққәт қозғиди

Тәңритағ торида берилгән хәвәрдин қариғанда, уйғур аптоном район даирилири “намратларни көчүрүп ронақ тапқузуш мәхсус түр қурулуши”ни йолға қоюп, униңға 300 милйон сом мәбләғ аҗратқан.

Хәвәрдә ейтилишичә, бу 300 милйон сом мәбләғ асаслиқи намратларни көчүрүп ронақ тапқузуш туралғуси, су, ток, йол, газ, алақә тори қатарлиқ ул әслиһәләрни ясаш вә униңға яндаш болған маарип, сәһийә, мәдәнийәт қатарлиқ аммиви мулазимәт әслиһәлириниң тәрәққиятиға ишлитилидикән. Хәвәрдә “көчүрүп ронақ тапқузуш түри” гә киридиған бу намратларниң кимләрни өз ичигә алидиғанлиқи, уларниң қәйәргә көчүрүлидиғанлиқи, немә үчүн көчүрүлидиғанлиқи һәққидә һечқандақ бир йип учи берилмигән. Бирақ, хәвәрдә намратларни көчүрүп ронақ тапқузуш киредит хизмити, вақтиниң җиддийлики, вәзипиниң еғирлиқи тилға елинған.

Мәлум болушичә, мәзкур қурулушқа қатнишидиған орунлар “дөләт тәрәққият банкиси шинҗаң уйғур аптоном районлуқ шөбә банкиси”, “шинҗаң дөләт мүлки селинма чәклик мәсулийәт ширкити”, “шинҗаң йөләш-ечиш тәрәққият ширкити” вә шуниңдәк мунасивәтлик наһийә, шәһәрләрни өз ичигә алидикән.

Уйғур аптоном район даирилири бундин илгириму “уйғур елидики ешинча әмгәк күчлирини йөткәп ишқа орунлаштуруш” дегән нам астида нурғун уйғур яшлирини хитай өлкилиригә әрзан әмгәк күчи сүпитидә йөткигән иди. Бу сиясәт әйни чағда уйғур елида нурғун наразилиқларниң қозғилишиға вә һәтта шявгүән вәқәси, арқидин үрүмчи вәқәсигә охшаш қанлиқ вәқәләрниңму келип чиқишиға сәвәб болған.