Уйғур аптоном районидики алий мәктәпләрдә оқуш әслигә келишкә башлиди

Мухбиримиз әркин
2020-04-06
Елхәт
Пикир
Share
Принт

Хитай даирилири уйғур аптоном районидики алий мәктәпләрниң оқутушини түркүмләргә бөлүм әслигә кәлтүрүшкә башлиди.

Хитай таратқулириниң хәвәр қилишичә, дәсләпки қәдәмдә аптоном райондики 22 алий мәктәпниң оқуши әслигә кәлтүрүлидикән. «Шинҗаң гезити» ниң хәвиридә, бу 22 алий мәктәпниң 8-апрелдин башлап оқуш башлайдиғанлиқини билдүрүлгән. Хитай һөкүмити вухәндә партлиған корона вируси юқуми сәвәблик райондики мәктәпләрниң қишлиқ тәтилини узартқаниди. Оттура-башланғуч вә бир қисим кәспий мәктәпләрниң оқуши 23-март әслигә кәлтүрүлгән шундақла райондики көңүл ечиш сорунлири бирдәк ечиветилгәниди.

Лекин хитайниң бу һәрикити чәтәлләрдики көзәткүчиләрниң әндишисини қозғиған. Улар хитайниң райондики юқумға аит толуқ мәлуматларни йошурғанлиқи, униң ишләпчиришни әслигә кәлтүрүшни дәп, «зор тәвәккүлчилик» қиливатқанлиқини әйиблигәниди. «Шинҗаң гезити» ниң қәйт қилишичә, 8-апрелдин башлап оқуш башлайдиған тунҗи түркүмдики 22 алий мәктәп «шинҗаң теббий университети», «шинҗаң сәнәт институти», «үрүмчи кәспий университети» қатарлиқларни өз ичигә алидикән. Даириләр райондики мәктәпләрниң оқушини әслигә кәлтүрүш билән бир вақитта хитайниң юқум районлиридин «шинҗаңға ярдәм бериш» намида оқутқучи йөткәшни давамлаштурмақта.

Хенәндики «дахе ториниң ашкарилишичә, 3-айниң ахирлирида хенәндин 249 нәпәр оқутқучи 2 түркүмгә бөлүнүп қумулға йөткәп келингән. Мәлум болушичә, бу хитай һөкүмитиниң 2020-йили «шинҗаңға ярдәм бериш' намида уйғур райониға 10 миң кишилик оқутқучи йөткәш пиланиниң бир қисми икән. Хитай һөкүмити бу арқилиқ «шинҗаң маарипиға ярдәм бериватқанлиқини илгири сүрсиму, лекин көзәткүчиләр, мәзкур пилан хитайниң уйғур маарипини пүтүнләй хитайчилаштуруп йоқитиштин ибарәт «мәдәнийәт қирғинчилиқи» ниң бир парчиси икәнликини қәйт қилмақта.

Пикирләр (0)
Share
Толуқ бәт