Uyghur rayonida eskerliktin chékin'gen xitay herbiylirige mulazimet qilish bash etriti qurulghan

“Shinxu'a tori” ning 5-séntebir küni chiqarghan xewirige qarighanda, yéqinda Uyghur rayonida “Septin chékin'gen herbiyler mulazimet qilish bash etriti” , shundaqla pütkül rayon teweside mushu xil mulazimet qilidighan 14 tarmaq etretni qurghan.

Xewerde éytilishiche, Uyghur rayonida septin chékin'gen, dem élishqa chiqqan herbiyler 50 mingdin köp bolup, ular üchün 2439 mulazimet etriti qurulghan. Ular asasen xitay puqraliri we hökümetning qollishi bilen qurulghan hemde “Xelq özining armiyesini himaye qilidu” dégen sho'ar astida pida'iylarche heriket élip barghan. Xitay hökümiti bu qétim barliq etretni ixchamlap, teshkillik, sistémiliq halgha keltürgen we ularni “Kompartiyege menggü egiship mangidighan qoshun” qilmaqchi bolghan.

Xewerde déyilishiche, 2018-yili Uyghur aptonom rayonida eskerliktin chékin'gen xitay herbiylirining ishlirini bir terep qilidighan mexsus bir nazaret derijilik orun qurulghan. Mezkur nazaretning naziri yü dowshing, “Septin chékin'gen herbiyler mulazimet qilish bash etriti” ning eskiriy septin chékin'gen xitay herbiylirini shu jaygha yerleshtürüsh, rayonlashturush, shundaqla jiddiy ehwallar körülse, ularni teshkillep ishqa sélish wezipilirining barliqini tilgha alghan.

Uyghur rayoni xitayning herbiy jehettin eng küchlük qamal qilidighan rayonliridin biri bolup, resmiy herbiy qoshundin bashqa yene bingtüen eskerlirining yérim herbiy halette turidighanliqi melum. Bu herbiylerning turmushigha köngül bölüsh xitay hökümitining muhim wezipiliridin birige aylan'ghan.

Amérikadiki analizchi ilshat hesen bingtüenning roli heqqide söz bolghanda, xitayning hemishe qéri eskerlirining shanliq ish-izlirini teshwiq qilidighanliqini, kommunist xitayning bu rayondiki ishghaliyitining dawam qilishi üchün herbiylerning bu rayonda “Menggü yiltiz tartishi” ni siyaset qilip belgiligenlikini éytqanidi.