Xitay da'iriliri “Shinjang ijtima'iy penler akadémyesi” ning “Tarix tetqiqati instituti” bilen “Din tetqiqati inistituti” ning derijisini östürgen

Xitayche “Shinjang géziti” torining 29-yanwar chiqarghan xewirige qarighanda, Uyghur rayonidiki xitayning shinjang ijtima'iy penler akadémyesige qarashliq ilgiriki “Tarix tetqiqati orni” we “Din tetqiqati orni” ning derijisi östürülüp, “Tarix tetqiqati inistituti” we “Din tetqiqati inistituti” dégen nam bilen wiwiska ésilghan. Xewerde bu orunlarning derijisining östürülüshi we qaytidin wiwiska ésilishi, “3-Qétimliq shinjang xizmiti yighini rohini izchillashturushtiki muhim istratégiyelik pilan,” déyilgen.

Xewerde yene bu tetqiqat inistutlirining markisizmning diyalikték matériyalizm we tarixiy matériyalizmliq tetqiqat prinsipi boyiche tetqiqat élip baridighanliqi, zamaniwi mesililerge jawab bérishke yétekchilik qilidighanliqi, shu arqiliq “Shinjangning uzun muddetlik eminlikige munasiwetlik chongqur mesililerni hel qilishta tedbir belgileshke meslihet béridighanliqi, tüzülmide yéngiliq yaritishta yéngi sinaqlarni aldi bilen élip baridighanliqi” alahide qeyt qilin'ghan.

Analizchilarning qarishiche, xitayning bu tetqiqat orunlirining derijisini östürüp, qaytidin wiwiska ésishi Uyghur rayonida até'izimliq idiye qurulushini ilgiri sürüshke yétekchilik qilish, dinsizliqning ornigha markisizm we sotsiyalizm idiyesini dessitish, tarixni burmilap xitayning menpe'etige uyghun tarixiy qarashni singdürüsh, dinni burmilap dinni xitayche sotsiyalizm üchün xizmet qildurush we shu arqiliq uni ajizlitip yoqitish istratégiysi üchün élin'ghan bir qedem iken. Emeliyette bu tetqiqat orunliri xitayning shinjangda siyaset belgilishige, shundaqla hiyle-mikir we süyqestke tolghan yéngi tedbirlerni élishigha, yéngi sinaqlarni yürgüzüshigimu meslihet bérish rolini oynaydiken.