Софийә ричардсон: “шинҗаңдики чәтәл ширкәтлири кишилик һоқуқни етибарға елиши керәк, болмиса җинайәткә шерик болиду”

Мухбиримиз әркин
2019.08.16

Кишилик һоқуқни көзитиш тәшкилати хитай бөлүминиң директори софийә ричардсон “вашингтон почтиси” гезитидә мақалә елан қилип, уйғур районидики чәтәл ширкәтлириниң бу районда йүз бериватқан кишилик һоқуқ дәпсәндичиликигә шерик болуп қалмаслиқни агаһландурди.

Ричардсон ханим бу агаһландурушни өзиниң 16 ‏-авғуст күни елан қилинған “шинҗаңдики чәтәл ширкәтлири кишилик һоқуқни етибарға елиши керәк, болмиса җинайәткә шерик болиду” сәрләвһилик мақалисидә оттуриға қойған. Униң мақалисидә тәкитлишичә, хитай һөкүмитиниң бу райондики қорқунчлуқ кишилик һоқуқ хатирисини нәзәрдә тутқанда хәлқара ширкәтләрниң бу райондики сода мәшғулатлириға техиму көп диққәт қилишниң вақти кәлгән. У һаллибуртон, дөләтлик васкетбол җәмийити нба қатарлиқ америка ширкәтлириниң бу районда паалийәт елип бериватқанлиқини әскәртип, чәтәл ширкәтлириниң хитай һөкүмитиниң бастуруш һәрикәтлиригә ярдәмләшкәнлик тарихий барлиқи, бәзи ширкәтләр җәмийәтниң бесимида сияситини өзгәрткән болсиму, лекин бәзи ширкәтләрниң бурунқи сода мунасивәтлирини ташлиғанлиқини билдүргән. Униң қәйт қилишичә, нөвәттә хитайниң кеда фейшүн, хитай електрон технологийә гуруһидәк бәзи ширкәтләр хитай һөкүмитигә һәмкарлишип, райондики хитай аманлиқ органлириниң телефонда аваз тонуши, йүрүш-туруши гуманлиқ кишиләрни тәқиб қилишиға ярдәмләшкән.

Ричардсон ханим мақалисидә йәнә термо-фешир, баҗир ширкитидәк бәзи америка карханилириниң мәзкур райондики һөкүмәт вә ширкәтләр билән һәмкарлишишни тохтатқанлиқи, башқа ширкәтләрниң уларни үлгә қилиши керәкликини билдүргән. Униң қәйт қилишичә, уйғур районидики чәтәл ширкәтлири дәрһал бу районниң кишилик һоқуқ вәзийитини баһалап чиқиши, мәһсулатлириниң мәзкур районда башқа мәқсәткә ишлитиливатқан яки ишлитилмәйватқанлиқини, бу райондики хитай карханилириға заказ қилған мәһсулатлириниң ишләпчиқирилишида әмгәк һәқлиригә әмәл қилинған-қилинмиғанлиқини тәкшүрүши, ширкәтләр юқириқи әһвалларни 3‏-бир мустәқил тәрәпниң тәкшүрүшигә һавалә қилиши, өзлириниң уйғур районидики сода паалийәтлиридә очуқ-ашкара болуши, өзи билән һәмкарлишиватқан йәрлик кархана яки һөкүмәт органлириниң исмини ашкара елан қилиши керәк икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.